Ulttyq qundylyq ulyqtalǵan dýmandy keshti ótkizýge «Qazaq analary. Dástúrge jol» qoǵamdyq birlestigi jáne «Hantalapaı» ortalyǵynyń qyzmetkerleri uıytqy boldy. Aq dastarqan basyna jaıǵasqan meımannyń qolyna sý quıý syndy ǵuryptan bastaý aldy kórikti kesh. Oń qanatqa uıymdastyrylǵan kórme dombyra, qobyz, shańqobyz, sybyzǵy sekildi qasıetti aspaptar men kádesyımen bezendirilgen.
Alashtyń esti ánderi shyrqaldy, dáýlesker kúıshiler dombyranyń qos sheginen shertpe, tókpe kúı bebeýletti. Bes myń jyldan beri qaraıǵy taǵylymdy salt-dástúr men birqatar kádeli kórinis sahnalandy.
Rýhanı keshtiń tizginin ustaǵan Arqanyń aıtýly asabasy Aıtýǵan Yrysaldın ataly sózben, ajarly naqyshpen is-sharanyń shyraıyn kirgizdi. Elordanyń irgesindegi Qosshy shaharynan kelgen etnoansambl ónerimen halyqty tánti etip, beý degizdi.
Oblys ákiminiń orynbasary Erlan Qusaıyn, «Amanat» partııasy jergilikti fılıalynyń tóraǵasy Bekzat Altynbekov bastaǵan el azamattary qalyń jurtshylyqty Ulys kúnimen quttyqtady. Tól mádenıetimizdi órkendetip júrgen keshtiń uıymdastyrý alqasyna, meıramhana qojaıyny Danııar Qalymbet pen mádenıet janashyry Elmıra Saılaýqyzyna alǵaýsyz alǵystaryn bildirdi.
Meıramhana tórinde kezektese óner kórsetken myń buralǵan bıshiler, daýsy alty qyrdan ári asatyn ánshiler keshtiń shyraıyn kirgizdi. «Dala dýman» etnofolklorlyq sazdy keshi tek biryńǵaı mýzykalyq qoıylym ǵana emes, kópten qaýyshpaǵan jandar emen-jarqyn júzdesip, rýhanı baıyp qaıtatyn dástúrli merekege aınalǵandaı.
Bul kesh tól tarıhymyzdy, ulttyq bolmysymyzdy aıshyqtaı tústi.
Qaraǵandy oblysy
