Sýretti túsirgen – Erlan OMAR, «EQ»
Osyǵan oraı keshe Prezıdent janyndaǵy ortalyq kommýnıkasııalar qyzmetinde Naýryz meıramyn atap ótýge qatysty brıfıng ótti. Is-sharada sóz alǵan Mádenıet komıteti tóraǵasynyń orynbasary Sábıt Barlybaev aqjoltaı habardy jetkizdi.
– Bıyldan bastap Memleket basshysynyń usynysymen elimizdiń barlyq óńirinde Naýryz merekesin jańa formatta ótkizý josparlanyp otyr. Merekeni 14-24 naýryz aralyǵynda ótkizý usynyldy. Naýryzdyń biregeı logotıpi bekitilip, elimizdiń barlyq aımaǵyna taraldy. Tarıhı turǵydan alǵanda on kúnge jalǵasatyn bul is-shara Naýryznama dep atalady. Árıne, ulyq meıram týraly derekter bizdiń uly fılosoftarymyz Mahmud Qashqarı, Máshhúr-Júsip Kópeıuly, Muhtar Áýezovtiń eńbekterinde kórsetilip jazylǵan. Al endi Naýryznamaǵa keletin bolsaq, 14 naýryz – Kórisý kúni, amal merekesi dep te atalady. Bul elimizdiń batys óńirlerinde saqtalǵan. Búgingi kúni atalǵan merekeni barlyq aımaqtarda toılaý usynyldy. 15 naýryz – Qaıyrymdylyq kúni dep belgilendi. Qoǵamǵa qaıyrymdylyq mádenıetin sińirip, janashyrlyq pen ózara qolushyn berý qundylyqtaryn qalyptastyrýymyz qajet. 16 naýryz – Mádenıet jáne ulttyq salt-dástúr kúni atalyp ótedi. Mádenıetimiz ben ónerimizdi nasıhattaýǵa arnalyp, respýblıka boıynsha túrli is-shara uıymdastyrylady. 17 naýryz – Shańyraq kúni dep belgilendi. Otbasylyq qundylyqtardy dáripteýge, bul kezde ónegeli urpaq tárbıelegen úlgili otbasylarǵa arnalǵan is-sharalar ótedi. Aqsaqaldarymyz jas otbasylarǵa bata beredi. 18 naýryz – Ulttyq kıim kúni. Elimizdiń barlyq óńirinde ultyq kıimimizdi nasıhattaýǵa baǵyttalǵan túrli is-shara josparlanǵan. 19 naýryz – Jańarý kúni kóktemgi aǵash egý dástúrimen jalǵasady. 20 naýryz – Ulttyq sport kúni elimizdiń barlyq aımaqtarynda túrli jarystar uıymdastyrylady. 21 naýryz – Yntymaq kúni jalpy halyq bir-birine degen syı-qurmetterin arttyryp, tatýlyq pen birlikti nasıhattaýǵa arnalady. 22 naýryz – Jyl basy. Bul kúni elimizdiń barlyq óńirlerinde jalpyhalyqtyq mádenı-sporttyq is-sharalar ótkizilip, stıldi etnoaýyldar men túrli jármeńke uıymdastyrylady, kıiz úıler tigilip, túrli jármeńke uıymdastyrylyp, mádenı sharalar ótkiziledi, – dedi Sábıt Barlybaev. Sonymen qatar ol 14-23 naýryz aralyǵynda «Naýryz bazarlyq» maýsymy jarııalanatynyn baıan etti. Ártúrli saýda ornynda jappaı satylymdar, jeńildikter qarastyrylyp, halyqqa yńǵaıly saýda isi usynylmaq. Al Naýryznamanyń qorytyndysy – 24 naýryz kúni Tazarý kúni dep jarııalanyp, elimizdiń barlyq aımaǵynda jalpyulttyq ekologııalyq aksııa ótkizilmek.
Sonymen qatar Astana qalasy Mádenıet basqarmasy basshysynyń orynbasary Nuran Qamzın elordada ótetin is-sharalar týraly aıtyp ótti.
– Qala ákimdigi elordada Naýryz meıramynyń qarsańynda turǵyndar men qonaqtar úshin 200-ge jýyq is-shara ótkizýdi josparlap otyr. EXPO halyqaralyq kórme ortalyǵynda kóshpeli óner festıvali ótedi, qazirgi ýaqytta daıyndyq jumystary júrgizilip otyr, 21-22 naýryzda saǵat 11.00-den 16.00-ge deıin Qalamger monýmenti jáne basqa oryndarda estrada juldyzdarynyń qatysýymen negizgi merekelik konsertter uıymdastyrylady. Sonymen qatar qalanyń bes aýdanynda 30-dan astam merekelik konsert ótedi, – dedi ol.
Osylaısha, elimizdiń rýhanı qýatyn, ulttyq tanymyn keńeıtetin biregeı merekemiz jańasha atalyp ótpek. Bul – halqymyzdyń rýhanı ımmýnıtetine, san ǵasyrlyq berik ulttyq kodyna oń áser eteri sózsiz.
