Májilis spıkeri Shveısarııa Qazaqstannyń Eýropadaǵy mańyzdy saıası-ekonomıkalyq seriktesi ekenin jáne elimizge ınvestısııa salýdan kóshbasshylardyń úshtigine kiretinin atap ótti.
– Elderimiz arasyndaǵy dıplomatııalyq qarym-qatynas ornaǵan otyz jyl ishinde senimdi saıası dıalog jolǵa qoıyldy. Saýda-ekonomıkalyq jáne ınvestısııalyq yntymaqtastyq tabysty damyp, mádenı-gýmanıtarlyq baılanystar artyp keledi. Qazaqstannyń jańa ekonomıkalyq baǵyty sheteldermen iskerliktiń keń múmkindikterin ashady. Osyǵan baılanysty biz Qazaqstan naryǵyna shveısarııalyq seriktesterimizdi shaqyramyz, – dedi Erlan Qoshanov.
Palata spıkeri elshige Memleket basshysynyń saıası reformalary týraly aıtyp, sonyń nátıjesinde búginde Májiliste alty partııa men birmandatty okrýgten saılanǵan depýtattar bar ekenine nazar aýdardy.
Elshi Qazaqstan men Shveısarııanyń ekonomıkalyq, ǵylymı-tehnıkalyq, ekologııalyq bilim berý salasyndaǵy ózara is-qımylynyń áleýetin tolyǵymen paıdalaný kerektigimen kelisti. Onyń aıtýynsha, parlamentaralyq yntymaqtastyq bizdiń baılanystarymyzdy nyǵaıtýda mańyzdy ról atqarady. Osy turǵyda taraptar Májiliste jáne Ulttyq Keńeste qurylǵan parlamenttik dostyq toptaryn, sondaı-aq komıtetter men saıası partııalardyń fraksııalarymen jumys isteýge ýaǵdalasty.
Elshi eki eldiń depýtattary tyǵyz yntymaqtastyqta jumys isteı alatyn birqatar baǵytty usyndy. Onyń ishinde aýyl sharýashylyǵy, sýdy únemdeý, logıstıka jáne bilim berý salalary bar.
– Shveısarııa joǵary kásibı tehnıkalyq qyzmetkerlerdi daıarlaýǵa múmkindik beretin dýaldy bilim berý júıesimen tanymal. Bizdiń tájirıbemiz Qazaqstanǵa paıdaly bolar edi, – dedi Salman Bal.
