Foto: Úkimettiń resmı saıtynan
Kezdesýge qatysýshylar Qazaqstan Úkimeti men DDU-nyń Densaýlyq saqtaý salasyndaǵy ornyqty damý maqsattaryna qol jetkizý jónindegi birlesken jumysyn talqylady. Atap aıtqanda, 2024-2025 jyldarǵa arnalǵan ekijyldyq yntymaqtastyq týraly kelisim sheńberinde qazirgi ýaqytta densaýlyq saqtaý qyzmetterimen jappaı qamtýǵa qol jetkizý, halyqtyń densaýlyǵyn jaqsartý jáne kadrlyq áleýetti arttyrý máselelerine erekshe nazar aýdarylýda.
DDU – Qazaqstannyń densaýlyq saqtaý salasyndaǵy mańyzdy strategııalyq seriktesi. Birlesken josparly jumystyń, sonyń ishinde tehnıkalyq jáne saraptamalyq qoldaýdyń nátıjesi halyqtyń tynys alý, qan aınalymy júıesi aýrýlarymen syrqattanýshylyq, sondaı-aq qaterli isikterden bolatyn ólim-jitim deńgeıiniń tómendeýi boldy. О́z kezeginde, Almaty deklarasııasynyń alǵashqy medısınalyq-sanıtarlyq kómek kórsetý qaǵıdattaryn ustaný eldegi ana men bala ólimi deńgeıiniń tómendeýine, ómir súrý uzaqtyǵynyń artýyna yqpal etti.
«Qazaqstan alǵashqy medısınalyq-sanıtarlyq kómekti nyǵaıtýdyń mańyzdylyǵy týraly máseleni kóterip keledi. О́zderińiz biletindeı, bizdiń Prezıdentimizdiń MSAK jónindegi elder koalısııasyn qurý jónindegi bastamasyn DDU bas dırektory jáne Uıymǵa múshe memleketter qoldady. Jenevada ótken Dúnıejúzilik densaýlyq saqtaý assambleıasynyń 78-shi sessııasy aıasynda múshe memleketter men damý jónindegi áriptesterdiń qatysýymen MSAK boıynsha elder koalısııasyn iske qosý bizdiń birlesken jumysymyzdyń mańyzdy qadamy bolmaq», dedi Oljas Bektenov.
Premer-mınıstr elimizde densaýlyq saqtaý mekemelerinde de, úıde de medısınalyq qyzmettermen qamtýdy qarqyndy túrde keńeıtip jatqanyn atap ótti.
О́z kezeginde DDU óńirlik bıýrosynyń basshysy Hans Klıýge Qazaqstannyń ulttyq densaýlyq saqtaý júıesiniń turaqtylyǵyn arttyrýda aıtarlyqtaı jetistikterge qol jetkizgenin atap ótti.
Kezdesý qorytyndysyna sáıkes, halyq densaýlyǵynyń joǵary deńgeıine qol jetkizý maqsatynda kórsetiletin medısınalyq qyzmetterdiń sapasyn arttyrý boıynsha aldaǵy jumysty kúsheıtý baǵyttary atap ótildi.
