Zoobaqtaǵylardyń aıtýynsha, kishkentaı aıýlardyń anasy Gerdanyń densaýlyǵy jaqsy. Ol osymen úshinshi ret ómirge qonjyq ákelip otyr eken.
- Gerda buǵan deıin 2017 jáne 2021 jyly tóldep, barshamyzdy qýantqan bolatyn. Ol kezde olarǵa bizdiń paraqshamyzǵa jazylǵan ózderińiz at qoıǵan bolatynsyzdar. Jańa týǵan qonjyqtar ázirge anasynyń qasynda. Qonjyqtar jarty jylǵa deıin anasynyń sútimen qorektenedi, - delingen zoobaq málimetinde.
Qazir Gerdaǵa laıyqty mólsherde azyq berilýde. Onyń súıikti qoreginiń ishinde – jemis-jıdek, et, balyq, botqa, nan, jarma, túrli vıtamınder bar. Qazirgi ýaqytta Gerda qonjyqtarymen birge óziniń apan-úıshiginde. Ol kishkentaı aıýlardy qyzmetkerlerge de kórsetkisi kelmeı, baýyryna basýda.
Aıta keteıik, ázirge qonjyqtardyń jynysy anyqtalmaǵan. Jynysy anyqtalǵan soń olarǵa at qoıýǵa baıqaý jarııalanatyn bolady.
