Ánsheıinde ortasy oısyraı, jartylaı júdep turatyn mádenıet saraıynda bul kúni ıne shanshar jer bolmady. Osyǵan qarap-aq, án ushyp, óleń qonǵan óńirdegi dástúrli ánshige degen dúıim jurttyń qurmetin, ulttyq ónerge degen yqylasyn ańǵarýǵa bolar edi. Jarty ǵasyr kıeli sahna tórinde ádemi qońyr daýsymen tyńdarman qaýymnyń talǵamynan shyǵyp kele jatqan ánshi Qazaqstan kompozıtorlarynyń shyǵarmalary men este joq eski kezeńdegi saf altyndaı jarqyraǵan halyq ánderin úzbeı nasıhattaýda. Bálkim shyǵarmashylyq qorynyń moldyǵy ónerdi súıgendiginen shyǵar. Jalǵyz Kókshe jurtshylyǵy ǵana emes, áldeneshe sheteldiń kirpııaz kóńil tyńdarmany da Bısaranyń ónerine tánti bolǵan. 2001 jyly Qazaqstan Respýblıkasy Táýelsizdiginiń 10 jyldyǵynda Bısara Mákenovanyń qaıtalanbas ǵajap daýsy Alashtyń án óneriniń suńǵyla sańlaqtary Ǵarıfolla Qurmanǵalıev, Kenen Ázirbaev, Baıǵabyl Jylqybaevtarmen qatar qoıylyp, «Ǵasyrlar sazy», «Qazaqstan halyqtyq mýzykalyq antologııasy» atty altyn dıski jazyldy. «Kókshetaýym – án týym!» jeke án jınaǵy jaryq kórdi.
Shyǵarmashylyq keshte ásem án shyrqalyp, kúmbirlegen kúı tartyldy. Kókshe tórindegi kórikti keshke arnaıy kelgen Qazaqstan Respýblıkasynyń eńbek sińirgen ártisi Maıra Ilııasova men Qazaqstannyń mádenıet qaıratkeri Araılym Rahymqyzy mándi sharanyń mazmunyn ústeı tústi. Kesh barysynda Qazaqstannyń halyq ártisteri Qaırat Baıbosynov, Roza Rymbaeva, Ramazan Stamǵazıev beınebaıan arqyly jyly lebizderin jetkizdi.
Qart Semeıde týyp, bar shyǵarmashylyq ǵumyry án besigi – Kókshede ótip kele jatqan Bısara Mákenova elge degen rızashylyǵyn jetkizgen kezde tebirenbegen adam qalǵan joq. Keshtiń taqyryby da taýyp qoıylǵan eken desti. Shynynda da kórikti Kókshe asylyn ardaqtaı biletin, bar meıirin tógetin, mártebesin asyratyn jer ǵoı. Sondaı yqylasty kórip kele jatqan ánshige án kóginde qalyqtar shalqar shabyt syılaǵan da eldiń ánge, ánshige degen móldir mahabbaty. Al ánshi bolsa «Aınalaıyn Kóksheden, erkeletken» dep dóp basyp aıtyp otyr.
Kókshetaý
