Qylyshynan qan tamǵan keńestik kezeńde oblystyq gazetti 20 jyl boıy basqarǵan qalamgerdiń qaıratkerligi týraly kónekóz zamandastary esti estelikterin aıtýdan jalyqqan emes. Birneshe býyn tilshini tárbıelegen Battal Jańabaıulynyń tabandylyǵynyń arqasynda qazirgi kezde Sherhan Murtazanyń atymen atalatyn baspasóz úıi jýrnalısterge buıyrypty. Budan ózge de iri isteri az emes.
Baısaldy qalpynan tanbaǵan, kisilik kelbetin joǵaltpaǵan aqsaqal turǵan úıge jergilikti bılik eskertkish taqta ornatty. Oblys basshysy Erbol Qarashókeev pen Taraz qalasynyń ákimi Baqytjan Orynbekovtiń aıtýynsha, qalamgerdiń 95 jyldyǵyna arnalǵan iri is-sharalar aldaǵy ýaqytta retimen uıymdastyrylady.
Jambyl oblysynyń Qurmetti azamaty, Qazaqstannyń eńbek sińirgen mádenıet qaıratkeri Battal Jańabaıuly turǵan úıge ornatylǵan memorıaldyq taqtanyń ashylý saltanatyna qatysqan óńir basshysy Erbol Qarashókeev sóz sóılep, qalamger rýhyna qurmet kórsetti.
«Baspasózdiń róli qoǵam úshin qaı kezde de zor. Ásirese 100 jyldan astam tarıhy bar oblystyq «Aq jol»gazetiniń orny bólek. Qalamger aǵamyz óńir shejiresin tasqa tańbalaǵan osy basylymdy 20 jyl boıy jemisti basqarǵany belgili.
Qazaq halqy «Jaqsynyń aty, ǵalymnyń haty ólmeıdi» degendi tekke aıtpaǵan. О́ńir rýhanııatynyń órkendeýine súbeli úles qosqan ardager jýrnalıstiń júrip ótken joly keıingi býyn jastar úshin taýsylmas ónege desek te bolady. Jastar ol kisiniń esimin eshqashan umytpaıdy. Bizdiń moınymyzǵa artylǵan mindet – eren eńbektiń úlgisin kórsetken Battal aǵanyń ómir joly men eńbegin el arasynda nasıhattaý, óskeleń urpaqty eńbeksúıgishtikke baýlý», dedi Erbol Qarashókeev.
Is-shara barysynda sóz alǵan jazýshy-dramatýrg Elen Álimjan, Jýrnalıster odaǵy oblystyq fılıalynyń tóraǵasy Jańabaı Mıllıonov, ardager jýrnalıst, jazýshy Kósemáli Sáttibaıuly aıaýly aǵa týraly jyly estelikterimen bólisti.
Taraz
