Birjandy Birikken Arab Ámirlikteriniń áýe komanııasy Qazaqstannan shaqyrtyp alǵan. Qazir kelisimshart negizinde isteıdi. Áýe júrgizýshisi álemniń túkpir-túkpirine jolaýshy tasıdy. Ony alpaýyt sheteldik kompanııa basshylary úsh kúndik synaqtan soń birden jumysqa alǵan.
«Shetel áýe kompanııasynda jumys isteý – úlken tájirıbe mektebi. Álemniń ártúrli mekenine ushyp, ártúrli ult ókilderimen áriptes bolý, olardyń ádet-ǵurpyn, tili men mádenıetimen tanysý kóńil kókjıegimniń ashylýyna áser etedi. Qazaqstannan shyqqan ushqyshtar Qatar, Vetnam, Gonkong taǵy basqa da dúnıejúzilik áýe kompanııalarynda jumys istep jatyr. Al bizge avıasııa salasyn damytýǵa áli de kóp ter tógý kerek. Jańa ushý termınaldary salynyp, jańa baǵyttar ashyla berse, áýe qyzmeti de zamanaýı jaǵynan damı túspek», degen pikir aıtty ol.
Alysqa kóz tastasaq, onyń ómiri kózin ashqaly beri ushaqpen baılanysty. Nege deseńiz, ákesi Talǵatbek ushaqtarǵa tehnıkalyq qyzmet kórsetý ortalyǵynda jumys istegen. Reseıdegi Chkalov atyndaǵy avıasııalyq tehnıkalyq kolledjinde, sosyn Almatydaǵy Azamattyq avıasııa akademııasynda oqyǵan. Bala kezinde ákesi únemi «An-24», «Tý-134», «Iаk-42», «Tý-154» ushaqtarynda qalaı ınjener-mehanık bolyp júrgenin aıtyp beredi eken.
Alǵashynda arman qýyp Almaty qalasyndaǵy ákesi oqyǵan Azamattyq avıasııa akademııasyna oqýǵa túsken. Degenmen birinshi kýrsty aıaqtaǵan soń oqýyn tastap ketken. Solaı júrip «Air Astana»-nyń «Ab-Initio» ushqyshtardy daıyndaý baǵdarlamasy aıasynda emtıhan tapsyrady. Synaqty sátti tapsyryp, jaqsy nátıje kórsetken Birjan Amerıkadaǵy «Aerosim Flight Academy»-ge oqýǵa túsedi. Onda bir jarym jyl oqyp, keıinnen Belgııanyń Sharlerýa qalasyndaǵy «Belgian Flight School» ushqyshtardy daıarlaý mektebinde 3 aı bilim alady. Oqýyn bitirgen soń elimizdegi áýe kompanııasynda ushqysh bolyp 7 jyl istegen. Al osydan 3 jyl buryn álemdik kompanııalarǵa jumys isteý maqsatynda qujatyn jibergen. Onyń oıynsha, sheteldik kompanııalardyń tóleıtin jalaqysy bizdiń eldegi eńbekaqymen salystyrǵanda áldeqaıda mol. Qyzmetkerlerge jan-jaqty jaǵdaıda da jasap beredi. Al bizdiń «Otandyq áýe tasymaldaý salasyn áli de damyta túsý kerek», dep oılaıdy Birjan.
Qazir ol 600 adamdyq Airbus A380 ushaǵynda ekinshi pılot bolyp jumys isteıdi. Kóbine AQSh, Aýstralııa elderiniń, Eýropanyń iri qalalaryna ushady. Negizinde dúnıejúziniń barlyq kontınentterine reıster bar. Úlken ushaq bolǵan soń uzaq reıster jasaıdy. Ortasha alǵanda 12-13 saǵatty alady, onyń eń uzaq sapary – Birikken Arab Ámirlikterinen AQSh-tyń Kalıfornııa shtatyna ushý kezinde bolǵan. Ol kezde 16-17 saǵattaı áýede bolypty.
«Birikken Arab Ámirlikterinde ushqyshtarǵa barlyq jaǵdaı jasalǵan. Kompanııa turatyn úıdi ózderi beredi. Shaǵyn otbasy bolsa qaladan páter jaldap beredi. Kópbalaly otbasy bolsa, jer úıden beredi. Ushqyshtyń balalaryn halyqaralyq oqý oryndarynda tegin oqytady. Medısınalyq saqtandyrý bar jáne jylyna birneshe ret ushý bıletterin tegin beredi. Ushqyshtyń fızıkalyq jáne psıhologııalyq densaýlyǵy únemi álemdik standartqa saı bolýy kerek. Ushqyshqa da qoıylatyn talap óte joǵary. Aspanda bolýy múmkin kúrdeli jaǵdaılarǵa árdaıym daıyn bolýymyz kerek», dep aqtaryldy ushqysh.
Qazaqty ózge elge tanytyp júrgen Birjan dombyrany da sheber oınaıdy. «Eldi saǵynǵanda dombyra serigim» deıdi ushqysh.
