Qazaqstannyń batys óńirinde ejelden atalyp ótetin Kórisý kúniniń basty dástúri – aýyldyń, eldiń jasy úlken aqsaqaldaryna arnaıy baryp amandasý, qolyn alyp kórisý. Bıyl Memleket basshysynyń tapsyrmasymen jalpyhalyqtyq sıpat alǵan osy ıgi bastamany úlken-kishi jappaı qoldap ketti.
Dál osy kúni Batys Qazaqstan oblysynyń ákimi Narıman Tóreǵalıevtiń ózi ala tańmen turyp, ǵasyrdy eńserip qalǵan ázız ananyń úıine at basyn tiredi. О́ńirge jumys saparymen kelgen Eńbek jáne halyqty áleýmettik qorǵaý mınıstri Svetlana Jaqypovamen birge 99 jastaǵy Jámılá Kenjeǵalıevaǵa amandasyp, aq batasyn aldy. Tyl ardageri Jámılá áje búginde 8 balasynan 28 nemere, 70 shóbere, 8 shópshek súıip otyr eken.
«Biz – ejelden úlkendi syılaǵan halyqpyz. Búgin Kórisý kúni sizge amandasyp ketýge arnaıy keldik. Denińiz saý bolsyn, urpaǵyńyzdyń qyzyǵyn kóre berińiz!», dedi óńir basshysy ǵasyr jasaǵan ájege.
Dál osyndaı shynaıy kezdesý Aqjaıyq óńirindegi ónerli otbasylardyń biri Begálıevterdiń shańyraǵynda da boldy. Osydan 38 jyl buryn qurylǵan Begálıevterdiń otbasylyq ansambli áli kúnge deıin sahna tórinen túspeı keledi. Aldyńǵy tolqyn aǵa býynnyń ornyn keıingi jastar almastyrǵan ónerli ujymnyń yntymaǵy jarasqan otbasy mártebeli meımandardy qushaq jaıa qarsy alyp, naýryzkóje usyndy.
Qazaqstannyń barlyq pushpaǵyndaı, Batys Qazaqstan oblysynda da Naýryznama onkúndigi 23 naýryzǵa deıin sozylmaq. Oral qalasyndaǵy eń úlken alańda kıiz úıler tigilip, ulttyq dástúrge saı túrli is-shara ótip jatyr.
Osy alańnyń bir búıirinde turǵan eńseli «Atameken» óner ordasynyń sahnasynda respýblıkalyq VII «Jaiyq sazy» dástúrli óner festıvali ótti. Áıgili ánshi Ǵarıfolla Qurmanǵalıevtiń 115 jyldyǵymen oraılastyrylǵan bul is-shara aıtys aqyny Baýyrjan Shırmedınuly aıtqandaı, estrada emes, eski dalanyń esti ánderi tórge shyqqan keremet merekege aınaldy.
Aıtýly is-sharaǵa Qazaqstannyń halyq ártisi Ramazan Stamǵazıev, Qazaqstannyń eńbek sińirgen qaıratkeri Erkin Shúkimanov, belgili óner sheberleri Jáken Omarov, Dáýrenbek Árkenov, Ardaq Isataeva, Erbol Aıtbaev, Sáýle Taýdaeva, «Qurmet» ordeniniń ıegerleri Sársenǵalı Júzbaev, Qaırat Kákimov, «Eren eńbegi úshin» medaliniń ıegeri Jánibek Jámıev, respýblıkalyq baıqaýlardyń laýreaty Nurym Asqanov, Mádenıet salasynyń úzdigi Armat Islamǵalıev, Farhat Orazov, Memlekettik «Daryn» jastar syılyǵynyń laýreaty Kúnsulý Túrikpen, t.b. qatysty. «Atameken» sahnasynan qazaq dalasynyń ár túkpirinde qalyptasqan án mektebi ókilderiniń ólmes týyndylary shyrqalyp, tyńdarmandy tánti etti. Halyqaralyq, respýblıkalyq baıqaýlardyń bas júldesin talaı alyp júrgen qaztalovtyq úlgili «Qyz Jibek» bı ansambli Maıranyń ánin tamyljyta shyrqady. Konsertti júrgizýshi belgili aıtys aqyny Baýyrjan Shırmedınuly da kesteli sóz, keleli pikirlerimen jıynnyń ajaryn asha tústi.
Saz keshinde Batys Qazaqstan oblysynyń ákimi Narıman Tóreǵalıev Jaıyq jurtyn Amal kúnimen quttyqtap, ulttyq ónerimizdi, Batys dástúrli án mektebiniń negizin qalaýshy, ánshi-termeshi Ǵarıfolla Qurmanǵalıevtiń murasyn nasıhattap júrgen ónerpazdarǵa halyqtyń atynan zor alǵys aıtyp, kóktemniń jańarý hám jasarý merekesimen quttyqtady. Barlyq ánshi oblys ákiminiń Alǵyshatymen marapattalyp, kádesyıǵa ıe boldy.
Joǵaryda aıtqanymyzdaı, Naýryznama onkúndiginiń ár kúni túrli taǵylymdy is-sharaǵa toly bolmaq. Mundaı merekelik jıyndar barlyq aýdanda da ótip jatyr. Qaıyrymdylyq, ulttyq salt-dástúrdi nasıhattaý, otbasy qundylyqtaryn dáripteý, jan men tándi taza saqtap, jańarý jáne tazarý – Naýryznama onkúndiginiń basty sıpaty bolmaq.
Batys Qazaqstan oblysy
