E.Bóketov atyndaǵy Qaraǵandy ýnıversıteti fılologııa fakýltetinde bilim alǵan maman jıyrma alty jyl osy mektep-lıseıde sabaq berip keledi. Izdenimpaz pedagog ár sabaǵyna joba qorǵap shyǵatyndaı daıyndalady.
– Aldymda bilim alyp otyrǵan ár oqýshy – bir-bir jobam, – deıdi. – Bizdiń pánde eń aldymen balanyń tilge, ádebıetke qyzyǵýshylyǵy bolý kerek. Shyny kerek, gadjetke baılanǵan jastardyń nazaryn aýdarý ońaı emes, árıne. Gadjetti joqqa shyǵarmaı, sol arqyly da balalardy kitap oqýǵa baýlımyz. Rýhanı is-sharalar da oqýshylardyń yntasyn arttyrýǵa yqpal etedi, – deıdi pedagog.
Ásem ádebıetti ǵylymılandyrý baǵytynda úzdiksiz jumys istep júr. Nege deseńiz, tildiń, ádebıettiń teorııasyn bilmegen oqýshy jaýabyn jóndi bere almaıdy degen ustanymda. Sol sebepti de ár izdenisten ǵylymı negiz kóredi.
– Kópshilik muǵalim oqýshynyń jaýabyn ózi aıtyp qoıyp jatady. Bala suraǵyńyzǵa durys jaýap bersin, qate jaýap bersin, ózi jetkizýi kerek. Balanyń oıyn muqııat tyńdaý kerek jáne ózińizben bir deńgeıde emin-erkin áńgimelesý kerek. Sonda balanyń aıtary anyq bolyp, sabaǵyńyz sátti ótedi. Qazirgi balalarǵa qur sóz emes, kreatıv kerek. Jan-jaqty bolý qajet. О́ıtkeni balalardyń oıy kúrdelenip barady, – deıdi muǵalim.
Iá, ujymdaǵy ǵana emes, aımaqtaǵy áriptesteri ony shynymen de jańashyl dep tanıdy. Byltyrǵy oqý jylynda attestasııadan sátti ótip, pedagog-zertteýshi mártebesin rastap alǵan. Muǵalimderge qatysty ótetin ǵylymı-ádistemelik konferensııa, túrli trenıngten qalys qalmaıdy.
Árıne, ustazdyń kórsetkishi shákirtteriniń jetistigimen ólshenedi. Onyń shákirtteri túrli konkýrsqa, ıntellektýaldyq marafondarǵa, olımpıadalarǵa, ǵylymı-tájirıbelik konferensııalarǵa qatysyp, mektepterine olja salyp júr.
Á.Berikqyzynyń biz bile bermeıtin taǵy bir qyry bar. Ártistik. О́zi mektebindegi «Sahna syry» atty úıirmege jetekshilik etedi. Balalardyń jan dúnıesine ene alatyn ekiniń biriniń qolynan kele bermeıtin qasıeti men baldyrǵandardy keıipker álemine endire alatyn ártistik qabiletine áriptesteri qaıran qalyp jatady.
– Bala bolǵan soń olar kóńil kúı men sezimge jaqyn. Sahna degen kıe. Sahna degen ómir. Sol arqyly olarǵa rýhanı tárbıe beremiz. Túrli qoıylymdar qoıamyz. Jalpy, mekteptegi mádenı is-sharalarǵa oqýshylarym qalys qalmaıdy, qulshynyspen qatysady. Bul da kerek, – degen pikirimen bólisti keıipkerimiz.
Munyń bári bir ǵana eńbek degen sheńberdiń shekarasyna toptasady. Sol mańdaı ter eńbeginiń aqtalǵany – 2018 jyly Ybyraı Altynsarın atyndaǵy tósbelgini taǵynǵany. Jo-joq, qatelesemiz. Ásem ustaz olaı oılamaıdy. «Eńbegimniń janǵanyn oqýshylarymnyń jarqyn jetistikterimen ólsheımin», deıdi. Rasymen, úzdik ustazdyń júrek túkpirinde «shákirtterim ózimnen ozsa» degen izgi tilegi jatady emes pe?..
Ustaz – otbasynda aıaýly jar, qamqor ana. Joldasy Manarbek Qyzyrov áskerı qyzmetin abyroımen atqaryp, sol saladan zeınetke shyqqan. Qazir jeke kásippen aınalysady. Uldary Bekejan Bolashaq kolledjinde úshinshi kýrsta oqyp júr. Dene shynyqtyrý pániniń muǵalimi bolmaq nıeti bar. Al erke qyzdary Injý – anasy eńbek etetin mekteptiń 7-synyp oqýshysy. Qyzdary da anasynyń izimen júrip, muǵalim bolǵysy keledi. Bul shańyraq úshin ustazdyń qadiri tym bıikte.
Qaraǵandy oblysy
