Komıtet tóraǵasy Álı Bektaev Qazaqstan úshin agroónerkásip kesheni elimiz ekonomıkasynyń negizgi salasy ekenin atap ótti. Jańa tehnologııany paıdalaný arqyly qaıta óńdelgen ónimniń úlesin ulǵaıta otyryp, ony 70 paıyzǵa jetkizý týraly Memleket basshysy tapsyrmasynyń oryndalýyn qamtamasyz etý kerek.
«Qazaqstan úshin agroónerkásip sektory men qaıta óńdeý ónerkásibi azyq-túlik qaýipsizdigin qamtamasyz etý jáne aýyl sharýashylyǵy ónimderine ishki suranysty qanaǵattandyrýda mańyzdy ról atqarady. Úkimettiń, bıznes-qoǵamdastyqtyń jáne aýyl turǵyndarynyń birlesken kúsh-jigerimen ǵana agroónerkásip sektordyń turaqty damýyn qamtamasyz etýge jáne eldiń ımporttyq ónimderge táýeldiligin tómendetýge bolady», dedi Álı Bektaev.
Senator Zakırjan Kýzıev óz kezeginde Úkimet saǵatynyń qorytyndysynda komıtet óz quzyreti aıasynda memlekettik organdarǵa 27 usynys bergenin eske saldy. Ondaǵy 13 usynym boıynsha memlekettik organdar qajetti sharalar qabyldady, 6 usynym oryndalmady jáne 3 usynym boıynsha talqylaý jáne josparlaý satysynda jumys júrip jatyr.
Aýyl sharýashylyǵy mınıstriniń orynbasary Baǵlan Bekbaýov óz sózinde osy usynystardy iske asyrý úshin agroónerkásip keshenin damytýdyń 2021-2030 jyldarǵa arnalǵan tujyrymdamasyna tıisti ózgerister engizilgenin aıtty. Olar qaıta óńdeý kásiporyndaryn óndiris qýatynda barynsha qamtamasyz etý, aýyl sharýashylyǵy shıkizatyn qaıta óńdeý úlesin ulǵaıtý jáne ishki jáne syrtqy naryqtarda otandyq ónimniń básekege qabilettiligin arttyrý úshin memlekettik qoldaýdyń júıeli sharalaryn júzege asyrýǵa baǵyttalǵan.
