Tatý otbasy tálimi

Otbasylyq qundylyq, urpaq tárbıesi, ulttyq tanym men dástúr máseleleri áńgimege arqaý bolǵan is-sharaǵa otasqandaryna 50 jyldan asqan ardager jýrnalıst Jańabaı Mıllıonov pen jary Kúlbaǵıra Jaqsybaeva, qalamger, shańyraq qurǵandaryna 40 jyldan asqan Baýyrjan Momyshulynyń nemere inisi Beket Momynqul men zaıyby Aıgúl Sársenbaıqyzy, 25 jyl boıy bir shańyraq astynda tatý-tátti ǵumyr keship kele jatqan kompozıtor, Kenen Ázirbaev atyndaǵy oblystyq fılarmonııa dırektorynyń orynbasary Jandos Omarov pen jary Laýra Seıitalıeva qatysyp, jas otbasylar tarapynan qoıylǵan san alýan saýaldarǵa shynaıy jaýap berdi.

«Adam balasy birinshi kezekte jar tańdaý men mamandyq tańdaýda qatelespeýi kerek. Muny er-azamattar kókeıge to­qy­ǵany lázim. Osy turǵydan kelgende men – óte baqytty jandardyń birimin. Kúlbaǵıra ekeýmiz jarty ǵasyrdan asa ýaqyt boıy bir-birimizdi túsinip, tatý-tátti ǵu­myr keship jatyrmyz. Shyǵar­ma­shylyq adamyna ózin jan-jaqty túsinetin, baǵalaıtyn jar jolyqsa, odan asqan qandaı baqyt kerek? Sol úshin de Jaratqanǵa shúkir deımin. Er-azamat birinshi kezekte áıel adamdy qurmetteýi kerek», dedi J.Mıllıonov jas otbasylardyń biri qoıǵan saýal­ǵa jaýap berip.

Ardager jýrnalıst, Jazý­shy­lar odaǵynyń múshesi Beket Momynquldyń aıtýynsha, bala ákesine qarap boı túzeıdi, ákeniń táliminen asqan tárbıe joq. Ýaqytynda ózi de asqar taýynyń júris-turysyna qarap, eliktep ósipti.

«Biz orys ulty kóp shoǵyr­lan­ǵan aýylda turdyq. Qatarlas jigitter mektepte júrip-aq shylym shegýdi ádetke aınaldyrǵan edi. Ortanyń da óz áseri bar ǵoı. Bir kúni men de bılıard oınap júrip, shylym tartyp turǵanmyn. Ákem kirip kelgende álgi temekini myjyp tastap, aýzymdy jaýyp turǵanymmen, murnymnan tútin burqyrap ketti. Muny kórgen ákem esh urysqan joq. Kúlip shyǵyp ketti. Osy áreketinen-aq meniki qate ekenin túsindim. О́ıtkeni bizdiń otbasymyzda eshkim shylym shekpeıtin. Asqar taýymnyń aıqaıǵa baspaı, kúlip shyǵyp ketýiniń ózi maǵan qatemdi uqtyrdy. Jaman ádetten bas tarttym», dedi B.Momynqul óz oıymen bólisip.

Is-shara barysynda sóz alǵan Kenen Ázirbaev atyn­daǵy ob­lystyq fılarmonııa dırek­to­rynyń orynbasary Jandos Omarov ta otbasy qundy­lyq­tary, urpaq tárbıesi týraly óz oılaryn ortaǵa salyp, jas otbasylarǵa aqyl-keńesin aıtty.

Bul kúni jańadan otaý qurǵan Nyǵmetovter otbasynyń neke qııý rásimi uıymdastyryldy. Taraz qalalyq AHAT bóliminiń bas mamany Jansaıa Dúısekova kóp­shiliktiń aldynda jas otba­sy­nyń nekesin qıdy. Úlken­der­diń atynan sóz alǵan aqsaqal Saýranbek Jamalbekov izgi tile­gin aıtyp, aq batasyn berdi.

Is-shara sońynda sóz alǵan Taraz qalalyq máslıhatynyń tóraǵasy Kenjebek Oljabaı men «Anaǵa taǵzym» ortalyǵynyń dırektory Elmıra Myrzaǵalı otbasylyq qundylyqtar haqynda ilkimdi oılaryn ortaǵa salǵan meı­mandarǵa rızashylyǵyn jet­kizdi. Ádemi ándermen ádip­telgen is-sharaǵa arnaıy qatysqan qonaq­tar­ǵa baǵaly syılyqtar tabystaldy.

Taraz