«Kórisý kúni shýaqty kóktemniń alǵashqy kúnderimen sáıkes keledi. Muny qazaq halqynyń danalyǵymen kelgen meıram dep esepteımin, onyń tarıhy tereńde jatyr. Ertede kúzeýden qystaýǵa kóship júrgen ata-babalarymyz kún jylyp, qar erigen shaqta alystaǵy aǵaıynmen saǵynysa qaýyshyp, amandyq surasqan. Sondyqtan da aıtýly mereke adamnyń boıyndaǵy eń izgi qasıetterdi oıatady, qoǵamda, ujymda bir-birimizge degen syılastyǵymyzdy arttyrady», degen teatrdyń opera trýppasynyń dırektory, Qazaqstannyń eńbek sińirgen qaıratkeri Meıir Baınesh Kórisý kúniniń halqymyzdyń eń kóne dástúrleriniń biri sanalatynyn aıta kelip, onyń mán-mańyzyna da toqtaldy.
Iá, Kórisý kúniniń qazaq ómirinen, dúnıetanymynan alar mańyzy zor. Qytymyr qysty ótkergen aǵaıyn bul kúni bir-biriniń úıine qonaqqa baryp, tórt qubylasyn túgendep, amandyq surasady. Úlkender jastarǵa bata berip, «Jasyń qutty bolsyn!», «Bir jasyńmen!» degen tilekter aıtylady. Aıtýly mereke, ásirese, elimizdiń batys óńirinde keńinen taralǵan. Bul jaqta ony «Kórisý aıt», «Kórisý amaly» dep te aıtyp jatady. Osy rette Oralda týyp-ósken, qazirgi tańda «Astana opera» teatry balet trýppasynyń solısi bolyp eńbek etetin Sultanbek Ǵumar Kórisý kúnin batys aımaqtarda qalaı qarsy alatynyn aıtyp berdi.
«Bul mereke maǵan bala kúnimnen tanys. Oqýshy kezimde 14 naýryz kelgende mektepter ózara aralasyp, túrli is-shara ótkizetin edik. Jalpy, batysta Kórisý aıt jaqsy toılanady. Dál osy kúni barlyq týǵan-týys: aǵa-jeńgeler, kelinder, nemere-shóbereler áýlettiń úlkeni sanalatyn ata-ájemizdiń shańyraǵyna jınalyp, hal-jaǵdaı surasady, aq dastarqan basynda tilekterin aıtady. Mundaǵy maqsat – týysty biriktirý, bir atadan taraǵan urpaqtardy bir-birimen tanystyrý, aralaryndaǵy dostyq pen tatýlyqty arttyrý. Dana halqymyz ne istese de, bárin bilip istegen ǵoı. Qazir shette júrsek te, múmkindigimiz kelgenshe jaqyndarymyzǵa habarlasyp turýǵa tyrysamyz», dedi Sultanbek Ǵumar.
Teatr ártisteri atap ótkendeı, Kórisý kúni sekildi izgi meıramdar adamdardy jaqyndastyra túsedi. Al eń bastysy osyndaı merekeler arqyly biz ózimizdiń ulttyq salt-dástúrlerimiz ben qundylyqtarymyzdy saqtap qalamyz jáne onyń urpaqtan-urpaqqa jetýine yqpal etemiz.
«Barlyǵyńyzdy kelip jetken Kórisý kúnimen shyn júrekten quttyqtaımyn. Otbasylaryńyzǵa tek yntymaq-birlik, molshylyq, denderińizge saýlyq, bastaryńyzǵa baq-bereke tileımin. Bar qıynshylyqty, ýaıym men ókpe-renishti artta qaldyryp, jańa jylǵa jaqsylyqpen, qýanyshpen qadam basyńyzdar. Ádiletti Qazaqstanymyz kórkeıip, halyqtyń ál-aýqaty jyldan-jylǵa artyp, álemniń ozyq elderiniń qatarynan kórine bereıik. Elimiz aman, jurtymyz tynysh bolsyn!», dep «Astana operanyń» jetekshi solısi, Qazaqstannyń eńbek sińirgen qaıratkeri Janat Shybyqbaev barsha Qazaq eline óziniń aqjarma tilegin jetkizdi.
Bul tamasha dástúrden M.Gorkıı atyndaǵy akademııalyq orys drama teatry da qalys qalmady. Teatr dırektory, Qazaqstannyń eńbek sińirgen qaıratkeri Aıbolat Jaýdyrdyń bastamasymen teatr tórinde «Sálem, Naýryz!» atty kórme ashylyp, ujym qyzmetkerleri Naýryz merekesiniń tarıhymen tanysyp, ulttyq án men bıden shashý shaty.
«Naýryz – qazaq úshin qasıetti meıram. Munyń elimizdiń tórin meken etken ózge ult ókilderin bir shańyraq astynda uıystyryp, bereke men birlikte jarasymdy ómir keshýine de yqpaly zor. Naýryz – meıirim men qamqorlyq, baýyrmaldyq pen izgilik, amal merekesi», dep atap ótti Aıbolat Janǵalıuly.
Osylaısha, elordanyń mádenı mekemeleri Kórisý kúnin zor qýanyshpen qarsy alyp, teatrlarynyń tórinde Ulystyń uly kúnin toılaýdy merekelik kóńil kúıde bastap ketti.
