Aýqymdy jáne maǵynaly jıynnyń aldynda ár baǵytta birneshe seksııalyq otyrys ótkizilip, quryltaı músheleriniń túrli taqyryptaǵy pikirleri tyńdaldy. Adam quqyn qorǵaý, otbasylyq zorlyq-zombylyqtarǵa tosqaýyl qoıý, máslıhattardyń rólin arttyrý, jergilikti qoǵamdyq keńesterdi naǵyz halyqtyń ókildi organdaryna aınaldyrý týraly naqty pikirler aıtyldy. Memleket basshysy Qasym-Jomart Toqaev quryltaıda kópshilik kútkendeı elimizdiń bolashaǵy, táýelsizdigimizdiń baıandylyǵy jolynda jasalynýǵa tıis birshama bastamany tilge tıek etti. Dinimizge, tilimizge qatysty biraz másele ashyq aıtyldy.
Ata-babalarymyzdyń tarıhymen birge jalǵasyp kele jatqan dinimizden aınymaı, mazhabymyzdyń maqsatyn buzbaı, ulttyq naqyshtarymyzǵa laıyq kıim úlgisinen taımaı, Islam dininiń talaptaryna berik bolýǵa bolatyndyǵyn jetkizdi. Shyndyǵynda da ár adamnyń ımany – júregi men tileginde. Sonymen birge myńdaǵan jyl boıy halqymyzdyń dástúrimen birge jasap kele jatqan Ábý Hanıfa mazhaby ustanymynan taımaýymyz kerektigin Prezıdent erekshe aıtty. Qazaq eline ıslamdy taratyp, ornyqtyrǵan Iаsaýı babamyzdyń rýhanı qundylyqtaryn dáripteýdiń tarıhı máni zor ekenin, onyń kesenesine álemge áıgili jádiger retinde erekshe kóńil bólý keregin, tipti jatqan jerindegi kók tastyń jamylǵyshyn qalpyna keltirý týraly tapsyrmasy eldi eleń etkizetin jańalyq boldy dep esepteımiz.
Al qazaq tili qazirgi zamanǵa laıyq ekonomıka, óndiris, tehnıka men tehnologııa tiline aınalýǵa barynsha múmkindigi bar ekenin Prezıdent anyq aıtty. Memleket basshysynyń bastamalary arasynan halqymyz úshin, ásirese jastarymyz úshin bes jaman ádetten qutylyp, alty qundylyqqa umtylý qajettigi týraly baǵdarlamalyq sózderin erekshe atap ótkim keledi. Úkimet pen úkimettik organdarǵa ózderiniń jumystaryn da, memlekettik baǵdarlamalardy da osyǵan sáıkestendirý týraly tapsyrmalar da berdi.
Osy aıtylǵannyń barlyǵy Adal adam formýlasynyń qaǵıdattaryna tolyq sáıkes keledi. Ol – ádiletti Qazaqstandy qalyptastyrýdyń aıqyn joly.
Álı BEKTAEV,
Senat depýtaty
