Massaget.kz jazǵandaı, din ókiliniń jaýaby Instagram jelisindegi paraqshalardyń birinde jarııalandy.
- Negizi, shekpegen durys qoı. Biraq ol adam 10-15 jyldan beri temeki shegetin bolsa, oraza kezinde ony tastaý qıyn bolady. Sondyqtan oǵan ýaqyt berý kerek. Bárimiz ol adamǵa munyń aram ekenin aıtatyn bolsaq, ol temeki tastaı almaıtynyn syltaý qylyp, oraza ustaýdan bas tartady. Odan da ony qoldaıyq, bárimiz teńbiz ǵoı. Nege biz bir-birimizdi tómendetemiz? Nege keıbir adamdar namaz oqyp bastaǵan kezde adamdardy ekige bólip bastaıdy? Men bulaı jasaı almaımyn. Ultymyz bir, ár qazaǵym - jalǵyzym, men olardy bólmeımin, namaz oqysa da, oqymasa da, tipti ishimdikke salynǵan bolsa da, ol meniń baýyrym. Osy sebepti bárińizden adamdardy bólmeýdi suraımyn. Qoǵam jumysta da, kóshede de, meshitte de bólinedi. Bólingennen góri, bárimiz jınalyp, bir bolýǵa tyrysaıyq, - dep jaýap berdi ımam.
