Foto: olympic.kz
Onda elimizdiń barlyq óńirinen, ıaǵnı 17 oblys, 3 qaladan kelgen 20 komanda sportshylary sap túzedi. Chempıonattyń ashylýyna Qazaqstannyń Grek-rım, erkin jáne áıelder kúresi federasııasynyń Bas hatshysy Dımash Sultanov, federasııanyń vıse-prezıdentteri Bılaldın Ýshýrov, Asqar Qýlov, Dáýren Jappasov jáne óńirdiń sport janashyrlary qatysty.
Baıraqty básekede 17 jasqa deıingi jasóspirimder men 23 jasqa deıingi jaýyryny jerge tımeıtin 1500-den astam jas sportshylar kúrestiń ár túrinen 10 salmaq dárejesi boıynsha beldesýdi bastap ketti.
«Elimizde grek-rım kúresi ótken ǵasyrdyń ekinshi jartysynan damı bastady. Onyń alǵashqy jemisi – 1980 jylǵy jazǵy Olımpıada oıyndarynyń nátıjesi. Jerlesterimiz Jaqsylyq Úshkempirov pen Shámil Serikov grek-rım kúresinen halqymyzdan shyqqan tuńǵysh Olımpıada chempıondary atanyp, keıingi býynǵa sara jol saldy. «Sport – eldiń mereıin asyryp, abyroıyn tasytatyn sala. Táýelsizdik jyldary el sportshylary halyqaralyq iri jarystarda top jaryp, kók baıraǵymyz asqaqtaı túsýde. Bul Qazaqstan sportynyń álemdik deńgeıde damyǵanyn kórsetedi», degen Prezıdentimiz Qasym-Jomart Toqaev sportshylarǵa zor senim artty. Sondyqtan aralaryńyzdan Otanymyzdyń dańqyn asyratyn sportshylar shyǵarynan úmittimiz», degen Almaty oblysy ákiminiń birinshi orynbasary Nurlan Ábdirahym sportshylarǵa sáttilik tiledi.
Qazaqstan chempıonatynyń alǵashqy kúninde 5 salmaq dárejesi boıynsha tartysty beldesýler bastaldy. On kúnge jýyqtaıtyn jarys kúndeliginde jeńimpazdar esimderi anyqtalatyn bolady.
Almaty oblysy
