80 kg salmaqta synǵa túsken 18 jastaǵy qazaqtyń qaısar uly Qytaı elinde óte jaqsy óner kórsetti. Jarysty shırek fınaldan bastaǵan Batyrhan bul mejede úndistandyq Akshaı Hýdodan basym tússe, jartylaı fınalda Saýd Arbııasynyń ókili Álı-Mýbrýk ál-Mýrbrýktyń osal tusyn ońaı tapty. «Eresekter dýyna qosylǵanyma kóp ýaqyt bola qoıǵan joq. Soǵan qaramastan ulttyq qurama bapkerleri maǵan úlken senim artyp, osyndaı jaýapty jarysqa apardy. Sol senimdi aqtaý úshin barymdy saldym. Shyny kerek, tusaýkeser kezdesýde biraz qobaljyǵanym ras. Biraq der kezinde óz-ózime kelip, jeńiske jettim. Ekinshi márte daıanǵa shaqqan bette qarsylasymnyń úreılenip turǵanyn baıqadym. Bul kórinis meni qanattandyra tústi. Aqyry ony da utyp, Olımpııa oıyndarynyń joldamasyna ıelik ettim, deıdi ol.
Jastar arasyndaǵy álem birinshiliginiń qola júldegeri Batyrhan Tóleýǵalı byltyr Qazaqstan Respýblıkasynyń Spartakıadasynda birqatar saqa sportshylardy jolynan yǵystyryp, bas júldeni oljalaǵannan keıin Qazaqstannyń ulttyq qurama komandasynyń sapyna qabyldandy. Sol aralyqta ol ózin jaqsy qyrynan kórsete bildi. Aqpan aıynda qandasymyz Birikken Arabtar Ámirliginiń (BAÁ) Fýdjeıra qalasynda ótken halyqaralyq týrnırde qola medaldy moınynda jarqyratty. Mine, endi, Batyrhan tórtjyldyqtyń basty dodasynda Qazaq eli namysyn qorǵaýǵa laıyq ekenin dáleldi.
Kelesi kúni 20 jastaǵy Samıhon Ábýbákirov óreli ónerimen jankúıerlerin qýantty. 59 kg salmaqta kúsh synasqan ol sheshýshi tusta fılıppındik Kýrt Krıan Barbosadan basym tústi. Onyń aldynda Samıhon Qyrǵyzstan men Taıland sportshylaryn jeńdi. Al ulttyq komanda sapyndaǵy eń tájirıbeli taekvondoshy +67 kg salmaqtaǵy Jánsel Denız úshin bul synaq sátsiz aıaqtaldy. Kezinde Olımpııa oıyndaryna qatysyp, Álem kýbogi, Azııa oıyndary, qurlyq chempıonaty sekildi dúbirli dodalarda bir emes, birneshe ret júlde alǵan jerlesimiz jartylaı fınalda tájikstandyq Mýnıra Abdýsolomovadan aılasyn asyra almady.
