Foto: edunews.kz
О́tken jyly Memleket basshysy Qasym-Jomart Toqaevtyń Qytaı Halyq Respýblıkasyna resmı sapary barysynda C.Seıfýllın atyndaǵy Qazaq agrotehnıkalyq zertteý ýnıversıteti men kórshi eldegi soltústik-batys aýyl jáne orman sharýashylyǵy ýnıversıteti (Northwest A&F University) arasynda qos dıplom ala otyryp, tamaq jáne qaıta óńdeý óndirisiniń tehnologııasy salasyndaǵy magıstrlik baǵdarlamany birlesip ázirlep, iske asyrý týraly kelisimge qol qoıyldy.
Soǵan baılanysty ardaqty aqyn, qoǵam qaıratkeri S.Seıfýllınniń esimin ıelengen joǵary oqý ornynda bizdiń magıstranttardy Qytaı soltústik-batys aýyl jáne orman sharýashylyǵy ýnıversıtetine oqýǵa qabyldaýdyń saltanatty is-sharasy ótti.
«Bizdiń magıstranttar álemdik deńgeıge sáıkes bilim alady dep senimmen aıta alamyn. Biz birlesken kúsh-jiger jumsap, qos dıplomdy bilim alýdy iske asyrǵanymyzǵa qýanyshtymyz. Bul bizdiń jastarymyzdyń ıgiligi úshin jalǵasatyn birlesken qyzmetimizdiń bastamasy ǵana dep bilemiz», dedi Qazaq agrotehnıkalyq zertteý ýnıversıtetiniń rektory, akademık Qanat Tireýov.
Sondaı-aq Qytaıdaǵy Harbın ǵylymı-zertteý veterınarııalyq ınstıtýtymen birlesip Qazaq agrotehnıkalyq zertteý ýnıversıtetinde Qazaqstan-Qytaı bıologııalyq qaýipsizdik zerthanasy quryldy. Sonymen qatar Soltústik-Batys, Pekın, Shyńjań, Henan ýnıversıtetterimen, Qytaı aýyl sharýashylyǵy ǵylymdary akademııasymen, «Huawei» kompanııasymen jáne sondaǵy basqa seriktestermen Qazaqstan-Qytaı ǵylymı-bilim berý jáne tehnologııalyq konsorsıýmy qurylýda.
Aıta keteıik, S.Seıfýllın atyndaǵy Qazaq agrotehnıkalyq zertteý ýnıversıteti sheteldik áriptester qataryn keńeıtip, bilim jáne ǵylym salasyndaǵy halyqaralyq baǵdarlamalar men jobalarǵa qatysý arqyly halyqaralyq yntymaqtastyqty bıik deńgeıde damytyp otyr. Qazir joǵary oqý orny álemniń 40-tan asa elimen jumys isteıdi.
