Sýretti túsirgen – Erlan OMAR, «EQ»
Týysqa, tanysqa, kórshige, alys aǵaıynǵa, aýyldasqa jaqsy tilek aıtyp, qýanyshty kóńil-kúı syılaıtyn kúnder osy. Amandyqpen kórisý, eske alý, jaqsylyq tilep alys-jaqynymen qaýyshý – osynyń bárin bir kúndik, tipti keıingi kezderdegideı úsh kúndik mereke dep shekteýge bolmaıdy. Sondyqtan «Naýryznama» dep atalǵan 14-23 aralyǵyndaǵy onkúndik bul merekeniń naq sıpatyn ashýǵa tıis.
Hrıstıandyq Batys Eýropa elderi men Amerıkada Jańa jyldy qarsy alatyn kezde «rojdestvolyq kanıkýl» degen on kún boıy beriletin merekelik demalys bar. Bul jylda beriletin eńbek demalysynan basqa, tek Jańa jyldyń qurmetine beriletin demalys. Alaıda ol hrıstıan dinimen tikeleı baılanysty. Bizdińshe, bir kezde bizdiń Naýryznamamyz da onkúndik demalys beriletin, biraq dinge qatyssyz, ejelgi Jańa jyldy qarsy alýǵa arnalatyn merekelik demalys bolatyn sııaqty.
Osy bastamany iske asyrýǵa Qyzyljar jurty túrli formattaǵy 200-den astam is-sharany qolǵa alyp otyr. Onda Naýryzdyń sıpatyn ashýǵa tıisti negizgi is-áreketter qamtylǵan. Aldymen Naýryzdyń «Kórisý» dep atalatyn ejelgi sıpaty atalyp ótti. Onda oblystyq kitaphana ujymymen oblystyq qazaq sazdy-drama teatrynyń qyzmetkerleri kelip kóristi. Bir-birin estip kórip júrse de, bir-birin jaqsy bilmeıtin eki ujymnyń qyzmetkerleri kóńildi kúımen, án-jyrmen arqa-jarqa bolyp tabysyp qaldy...
Mádenıet, tilderdi damytý jáne arhıv isi basqarmasynyń shyǵarmashylyq damý bóliminiń basshysy Aıagóz Nurseıitovanyń aıtýyna qaraǵanda 15 naýryzda «Qaıyrymdylyq kúni» dep belgilenip, qalanyń birneshe ujymy jalǵyzilikti, qam kóńildi jandardyń úı sharýashylyǵyna kómek qolyn sozatyn bolyp belgilengen. Osy kúnniń keshinde S.Muqanov atyndaǵy qazaq sazdy-drama teatry «Sarań» atty, al qalanyń qýyrshaq teatry «Poı pesnıý, moıa dombyra» atty spektaklderdi tegin kórsetti. 16 naýryz kúni «Abylaı han rezıdensııasynda» ulttyq dástúrlerdi kórsetip, «Naýryz meıramy – ulttyq dástúrlerdiń qaınar kózi» atty teatrlandyrylǵan is-shara sheńberinde murajaı zaldaryna ekskýrsııalar, qoldanbaly óner boıynsha sheberlik sabaǵy jáne ulttyq oıyndar ótti. 17 naýryz – «Shańyraq» kúni. Bul kúni jyl saıyn ótkiziletin dástúrge aınaldyrylǵan «Uly kúni Ulystyń, basy bolsyn yrystyń» atty respýblıkalyq aqyndar aıtysy ótti.
Al «Ulttyq kıim» kúni qazaqtyń ulttyq kıimderin nasıhattaýǵa arnalǵan túrli is-sharalar ótkizilip, ol «Dostyq mall» sýpermarketiniń oıyn-saýyq ortalyǵynda ulttyq stıldegi kıim men áshekeılerdiń kórme-jármeńkesi túrinde uıymdastyryldy. Sonymen qatar 19 naýryz – «Jańarý kúnine» oraı Aqan seri atyndaǵy Soltústik Qazaqstan oblystyq fılarmonııasynyń «Segiz seri» qazaq halyq aspaptar orkestriniń konserti, óńirimizge belgili sýretshi Vıacheslav Smırnovtiń «Týǵan ólke sýretshiniń kózimen» atty kartınalar kórmesi, S.Muqanov atyndaǵy OǴÁK «Jańǵyrý – jasarýǵa bastaıdy» atty áńgime-dúken bolady.
20 naýryz – Ulttyq sport kúni. Bul kúni oblystyń barlyq aımaǵynda jáne qalamyzdyń túrli alańdarynda ulttyq sporttan túrli jarystar, asyq atý, toǵyzqumalaq, sadaq atý jáne t.b. jarystar uıymdastyrylady. Al 21 naýryz – Yntymaq kúninde merekeniń basty sátteriniń biri «Botaı – uly dala mádenıeti» kórmesi bolmaq. Sýretshilerdiń kartınalarynda tek Soltústik óńiriniń ǵana emes, búkil Qazaqstannyń mádenı brendine aınalǵan «Botaı qonysy» arheologııalyq eskertkishi usynylady. 22 naýryzda oblys ortalyǵy men barlyq aýdanynda mádenı-sporttyq is-sharalar ótkizilip, ortalyq kóshelerde etnoaýyldar men túrli jármeńkeler uıymdastyrylady. On kúnge sozylatyn Naýryznama «Tazarý kúnimen» qorytyndylanady. Bul kúni elimizdiń barlyq aımaǵynda jalpyulttyq ekologııalyq aksııa ótedi.
Soltústik Qazaqstan oblysy
