Foto: Inform.kz
Qolǵa alynǵan ózgeristerdiń nátıjesinde halyq bılikke áldeqaıda jaqyndaı tústi. Quryltaı dala demokratııasynda format deńgeıinde tarıh jadynda saqtalyp qalǵan. Memlekettiliktiń taǵdyry syn tezinde qalǵan kezde ata-babamyz ortadan halyq ókilderin saılap, keleli máselelerdi osyndaı quryltaılarda sheshti. Aýzy dýaly, sózi ýáli azamattardyń oı-pikirin, joba-usynysyn talqylap, ortaq jáne ońtaıly pátýa jasasty. Búgin babadan qalǵan dástúr jalǵasyp jatyr. Memleket basshysy aıtyp ótkendeı, Quryltaıdy erekshelendiretin sıpat – onyń keń aýqymdylyǵynda, jumystyń sapasy men tıimdiligine tikeleı áseri bar azamattardyń basqosýy, halyqtyń únin, muń-muqtajyn, talap-tilegin shynaıy jetkize alýynda. Búginde otandastarymyz Úkimettiń, jalpy memlekettiń josparlaryn júzege asyrýǵa atsalysyp keledi. Júrgizilip jatqan reformalar olardyń suranysyn eskere otyryp júrgizilýde. Mysaly, Parlament pen jergilikti aýyl ákimderiniń saılaýy ótti. Endigi kezekte – aýdan, qala ákimderin saılaý. Munyń bári memlekettiń ashyqtyǵyn jáne eldi basqarýǵa óz úlesin qosý múmkindigin kórsetetin eleýli ózgeristerdiń belgisi.
Memleket basshysy alǵashqy Quryltaıda qazaq azamaty óz oıyn aıta alatyndaı platforma qalyptastyrý kerektigin aıtqan bolatyn. Nátıjesinde, búginde júzden astam Quryltaı múshesi halyq pen bılik arasyndaǵy ózindik kópirge aınaldy. Qazaq jerindegi tarıhı jádigerlerdiń birazy ulttyq qundylyq retinde IýNESKO tizimine endi. Bul tek Qazaqstanda emes, búkil Ortalyq Azııada ǵylymnyń damýyna serpin berdi. Tarıhı muramyzdy saqtaý jumystary jalǵasyp keledi.
Shaımardan NURYMOV,
Ulttyq quryltaı múshesi
ALMATY
