Foto: halyq-uni.kz
Serjant Muhıadın Sumaǵul men 2-synypty serjant Orynbek Sandybekov «Úzdik jaýynger-2024» jarysynda baq synaǵan 40 qatysýshynyń ishindegi birden-bir sheteldik boldy.
Ulttyq ulannyń, Qarýly kúshterdiń jáne AQSh-tyń basqa da kúshtik qurylymdary arnaıy bólimsheleriniń áskerı qyzmetshileri qatysqan jarysta bizdiń desantshylar jaýyngerlik daıyndyqqa baılanysty barlyq kezeńderde úzdik nátıjeler kórsetti. Áskerı qyzmetshiler M.Sumaǵul men O.Sandybekov dene daıyndyǵy, amerıkalyq úlgidegi atys qarýyn bólshekteý, qurastyrý, olardy jaýyngerlik kúıge keltirý, tapanshadan, avtomattan jáne pýlemetten atý jónindegi normatıvterdi sátti oryndady.
Jarys baǵdarlamasynda, sondaı-aq radıostansany baptaý jáne baılanysqa shyǵý, túngi jáne kúndizgi ýaqytta jergilikti jerdi baǵdarlaý, alǵashqy medısınalyq kómek kórsetý, jaralylardy alyp shyǵý sekildi tapsyrmalar da boldy.
20 shaqyrymdyq marsh kezinde qolyndaǵy qarý-jaraqpen jáne 16 kılogramdyq zatpen 35-gvardııalyq desanttyq-shabýyldaý brıgadasynyń serjanty M.Sumaǵul bir saǵat 59 mınýtta mejeli qashyqtyqty eńserip, jeńiske jetti.
– Jarysty uıymdastyrýshylar baıqaý tarıhynda mundaı jaǵdaı áli bolǵan joq dep málimdedi. Bizdiń desantshymyzdyń jetistigin aty ańyzǵa aınalǵan kenııalyq júgirýshi Olımpıada chempıony Elıýd Kıpchogeniń rekordymen salystyrdy, – dep naqtylady Qazaqstan Qarýly kúshteriniń Bas serjanty, serjant Temirbek Halyqov.
2-synypty serjant O.Sandybekov te jaýyngerlik daıyndyq pánderinde úzdik nátıjege jetip, marshta ekinshi orynnan kórindi.
