Alaıda qoǵamda qylań berip qalatyn dinı destrýktıvti aǵymdardyń tamyryna balta shaýyp, jolyna tosqaýyl bolý kerek. Osy máseleni qolǵa alatyn ýaqyt jetti. Men bul týraly oıymdy búrkep qalyp júrgenim joq. Bul keseldiń otyz jyl boıyna qoǵamǵa tıgizgen kesiri az bolmady. Endigi kezekte eldikti, egemendikti oılap, temirqazyǵymyzǵa qol sozatyn kez keldi. Buǵan deıingi aǵattyǵymyzǵa kóz júgirtip, odan sabaq alýymyz kerek.
Sonymen qatar qoǵamda rýǵa bólinýshilik te baıqalady. Tipti asqynyp barady deýge bolady. Biz ulttyq namys emes, rýlyq namystyń deńgeıine túsip, quldyraýǵa deıin ketip baramyz. Al shyndyǵynda rý ne úshin qajet? Munyń syry jaqyn aǵaıyndy adamdardyń bir-birine nekelespeýi úshin, sondaı-aq, bir-birimizdi tanyp, týystyq jaqyndyqty bildirtý úshin qajet. Budan basqa túsinik qalyptastyryp, qopsytýdyń túkke de qajeti joq. Osyndaı keleńsiz máselelerge tyıym salynýǵa tıis. Sonda ǵana ulttyq tutastyqqa qol jetkizemiz. Tutastyqqa jetken memlekettiń bolashaǵy jarqyn bolady.
Svetqalı NURJAN,
Ulttyq quryltaı múshesi
