Sonyń eń ózektisi – halqymyzdyń bereke-birligin saqtaý. El aǵalary arasyndaǵy aýyzbirlik urpaqqa ónege. Biz ózimiz jastar tárbıesine erekshe mán berip otyrǵandyqtan, olardyń adal adam bolyp qalyptasýyna, sanaly tárbıe alyp, jaqsy oqyp, adal eńbek etip, adal tabys tabýyna meılinshe yqpal etýimiz kerek.
Atyraý tórinde ótken Quryltaıdyń úshinshi otyrysynda Prezıdent Qasym-Jomart Toqaev birqatar qundylyqqa toqtaldy. Bul qundylyqtardyń aldyńǵy qatarynda – tarıhymyzdy túgendeý, tilimizdi damytý, mádenı murany dáripteý, din máselesi, otanshyl azamattar tárbıesi, ekonomıkamyzdyń dúnıejúzilik báseke qabilettiligin arttyrý, zań jáne tártip tur. Saıyp kelgende munyń bári – elimizde ádil qoǵam ornatýdyń, ozyq damyǵan memleket qurýdyń alǵysharttary. Ol úshin ne kerek?
Bizdiń jastarymyz jańasha oılaı bilgeni abzal. Ásirese bilim jáne ǵylym salasyn damytýdyń búgingi tańda orny bólek. Qazir álem damýdyń jańa satysyna qadam basty. Mundaı sátte ǵylym bizdiń ómirimizde negizgi ról atqarady. Qoǵamnyń damýyna, tehnologııanyń alǵa jyljýyna jáne adam ómiri men turmys jaǵdaıyn jaqsartýǵa mol múmkindik týdyrady. Ǵylymnyń mańyzyn tereń túsiný, ǵylymı zertteýlerdi odan ári qoldaý jáne damytý – adamzattyń bolashaǵyna qajetti basty sharttyń biri.
Elimizde talantty jastar barshylyq. Ýnıversıtetimizde álemdik deńgeıde tanyla bastaǵan jas ǵalymdarymyz bul jıynnan qunarly nár alyp, sóz joq, edáýir serpilistiń qaınar bastaýynda turǵandaı áserdi sezindiredi. El bolashaǵy – jastardyń qolynda. Demek ortaq maqsatqa uıysqan ulttyń erteńi – jastar ekenin qadap aıtýymyz kerek. Quryltaıdyń basym baǵyty osy bolsa kerek.
Erlan SYDYQOV,
L.N.Gýmılev atyndaǵy EUÝ rektory
