Foto: Astana ákimdigi
Mereke kúnderi ortalyq saıabaqta palaý ázirlenedi. Astanalyqtar úshin merekelik taǵamdardy О́zbekstan, Qyrǵyzstan, Túrkimenstan, Tájikstan jáne Ázerbaıjan elderiniń aspazdary daıyndaıdy. Budan bólek, XVIII ǵasyrlyq tarıhı qazanda han sorpasy ázirlenedi.
Meıramǵa Tájikstan men Iran elshilikteri atsalysady. Olar ulttyq naqyshtaǵy kıiz úılerdi bezendirip, óz mádenıetterindegi Naýryzdyń aıyrmashylyǵy men erekshelikteri týraly áńgimeleıdi.
Merekelik sharanyń shaqyrylǵan qonaqtary «Barys» hokkeı klýbynyń juldyzdary bolmaq. Olar kıiz úıde qoltańba taratyp, sport súıer qaýymmen kezdesedi.
Jappaı toılaý kezinde qonaqtar taqyryptyq foto aımaqtarda, ulttyq kıiz úılerde batyrlarmen, dombyrashylarmen, tazymen jáne búrkitpen estelikke sýretke túse alady.
Mereke Turan dańǵylyndaǵy ortalyq saıabaqta saǵat 13:00-de bastalady.
