Tórt saǵatqa sozylǵan merekelik marafonǵa Mádenıet jáne aqparat vıse-mınıstri Qanat Ysqaqov, Májilis depýtattary Qazybek Isa, Qaraqat Ábden, Únzıla Shapaq, Janarbek Áshimjan, Nurgúl Taý, Natalıa Dementeva, Dáýlet Muqaev, Senat depýtattary Darhan Qydyráli, Gennadıı Shıpovskıh, memleket jáne qoǵam qaıratkerleri, zııaly qaýym ókilderi, óner men mádenıet ókilderi, jáne erekshe erligimen kózge túsken azamattar qatysty.
Naýryz telemarafonynda: arnaıy qurylǵan etnoaýmaq, túrli taqyryptaǵy talqylaýlar ótkiziletin dıskýssııa alańy, tanymal meımandarmen suhbat júrgizilgen ekspress-kamera jáne ulttyq oıyndar kórsetilgen arnaıy alań men óner jáne sán úlgileri usynylǵan sahna uıymdastyryldy.
Dıskýssııa alańynda «Naýryznama» (Naýryzdy zamanǵa saı merekeleý dástúrin qalyptastyrý) taqyryby boıynsha: etnograf Serik Erǵalı, «Otandastar» qorynyń prezıdenti Abzal Saparbekuly, aqyn Serikzat Dúısenǵazy jáne jýrnalıst Gúlbaný Ánııat óz oılaryn ortaǵa saldy. «Ulttyq sezim» (ulttyq kıim ádebi, mýzyka, kıno, sport, teatr salasyndaǵy jetistikter) dıskýssııalyq taqyryby boıynsha Májilis depýtaty Janarbek Áshimjan, jýrnalıst, bloger Almas Altaı, etno-dızaıner Tarbııa Aıdynbaeva men akter Nurken О́teýil ózara pikir almasty. Al «Jańa zamannyń adamy qandaı bolýy kerek?» degen suraqqa QR Prezıdentiniń janyndaǵy Memlekettik basqarý akademııasynyń rektory Erlan Ábil, bloger Araı Álimhan, etno-dızaıner Turar Sattarqyzy jáne bloger Aman Mambetáli jaýap berdi.
Budan bólek, marafonǵa Almaty oblysynyń Ile aýdanynda avtobýs apaty kezinde jolaýshylardy aman alyp qalǵan 8-synyp oqýshysy Aqjol Geroı, boranda jolda qalǵan júkti áıelge kómektesken Ereımentaý aýdandyq Tótenshe jaǵdaılardy joıý bóliminiń qyzmetkeri Amangeldi Doskenov, muz oıylyp, sýǵa túsip ketken 17 jastaǵy elorda turǵynyn qutqaryp qalǵan Mereke Edresov, 1500-ge jýyq mýzykalyq aspapty jınap, saqtap júrgen qolóner sheberi, mýzykatanýshy Azamat Baqııa, búrkitshi, «Qazaqstan» telearnasynan shyǵatyn jańa «Búrkitshi qyz» telehıkaıasynyń keıipkeri Aısholpan Nurǵaıyp, alyp kúsh ıesi, Gınnes kitabynyń rekordshysy Sergeı Syrýlnıkov qatysty jáne Almatydaǵy jer silkinisi kezinde ota jasaýyn toqtatpaǵan Kardıologııa jáne ishki aýrýlar ǵylymı zertteý ınstıtýtynyń hırýrgy Ahyt Baǵdat tikeleı qosylymǵa shyqty.
Jobanyń telenusqasy «Qazaqstan» arnasynan 22 naýryz kúni saǵat 11:45-te efırge shyǵady.
