Eldana Pavlodardaǵy Aqqýly aýdanynda dúnıege kelipti. Aıtýynsha, jastaıynan anasy qazaq ónerine baýlyǵan.
– Meniń anam – qazaq, ákem – nemis. О́zimdi kishkene kezimnen qazaqpyn den sanaımyn. Qalyń qazaq ortasynda óstim, naǵashy jurtymnan kóp dúnıeni boıyma sińirdim. Aýylda qurby-qurdastarmen taı-qulyndaı tebisip óstik. Oqýshy shaǵymyzda aýyl mektebindegi ustazdarymyzben birge Naýryz meıramyn sán-saltanatymen ótkizetinbiz. Aýyl adamdarynyń bir-birine degen erekshe meıirimi, aýyldyń qurt-qaımaǵy men baýyrsaǵy kóńilden ketpeıdi. Mektepte júrip án salýdy úırendim, ónerli bolýym naǵashy jurtyma tartqandyǵymnan bolar, – dep jymııady ol.
Naýryz – Eldananyń otbasy úshin uly meıram. Ol mereke kúnderi kúndiz úlken sahnalarǵa shyǵyp, ózi qyzmet etetin Qorǵanys mınıstrligi Ortalyq ansambliniń quramynda án salsa, keshke úıine oralǵan soń jaınatyp dastarqan jaıady. Et asyp, baýyrsaq pisirip, dastarqanyna qystan qalǵan sarymaıy men qurt-jentin qoıady. «Anam «Naýryz – molshylyqtyń, jer aıaǵy keńip mal-jannyń aýzy kókke tıetin mezgil. Sondyqtan bul kezde dastarqanǵa baryńdy sal, qyzym. Meıramda kóńil jadyrasyn, ókpe-renishter umytylsyn», dep únemi aıtyp otyratyn. Joldasym Azamat, úıdegi úsh ulymyz da meıramdy aıryqsha qýanyshpen kútedi», deıdi ol.
Et pen baýyrsaq pisirýde Eldananyń aldyna túsetin názik jandar sırek. Onyń dastarqanynan dám tatqan jandar aspazdyq ónerine árdaıym maqtaý aıtyp jatady. Al ózi qazaqtyń ulttyq taǵamdaryn pisirýdi anasynyń janynda júrip úırengenin jetkizdi. «Anam boıjete bastaǵan shaǵymnan qazan-oshaqqa aralastyryp, et asýdy, baýyrsaqtyń qamyryn daıyndaýdy úıretti. Ettiń jumsaq bolýy, jaımanyń durys jaıylýynyń ózindik qupııalary bar. Ol mázirlerdi osy ýaqytqa deıin buljytpaı oryndap kelemin. Keıde tipti meniń etimdi saǵynyp aýyldan naǵashy jurtym, sonaý Qyrǵyzstannan qaıyn jurtym kelip ketedi. Shańyraqqa birneshe ulttyń ókilderi jınalyp, arqa-jarqa bolamyz. Qazaqsha án aıtyp, bı bıleımiz», deıdi ol.
Keıipkerimizdiń ánshilik óneri – bólek áńgime. Nebári 11 jasynda ónerimen kózge túsip, Roza Rymbaevanyń batasyn alady. 2006 jyly respýblıkalyq «Jas qanat» jastar baıqaýynda nemis qyzynyń án salýdaǵy erekshe qabiletin baıqaǵan marqum Murat Erǵalıev ony Astanaǵa jumysqa shaqyrady. Bul ýaqytta ol Pavlodardaǵy mýzyka mektebiniń dombyra bóliminde oqyp júrgen edi. 2009 jyly respýblıkalyq «Til – tatýlyq tiregi» atty baıqaýdyń bas júldesin jeńip alsa, al 2011 jyly Lıvan-Qazaqstan patrıottyq ánder baıqaýynda birinshi orynnan kórindi. Eńbek jolyn Astanada Ulttyq ulannyń bas oryndaýshysy qyzmetin atqarýdan bastasa, búginde Qorǵanys mınıstrligi Ortalyq ansamblinde oryndaýshy bolyp jumys isteıdi.
О́nerli jan áńgime sońynda keleshekte ózi týǵan aýylyna baryp turǵysy keletinin jetkizdi. Aýyldyń qurt-maıy men adamdardyń aqjarqyn peıili tartyp turady deıdi. Ol jaqta jylqy ustaıtyn nemis azamattary, týystary kóp. Aýylǵa degen saǵynysh jeteginde júrgen ánshi óziniń rýhty ánderimen, keńpeıil dastarqanymen jurtty áli de jadyrata bermek.
Pavlodar oblysy
