Infografıkany jasaǵan – Záýresh SMAǴUL ,«EQ»
Quryltaıdyń alǵashqy otyrysy Ulytaýda bastaý alsa, byltyr kıeli Túrkistanda ótti. Bıylǵy Quryltaıda Prezıdent «Adal adam – Adal eńbek – Adal tabys» taqyrybynda mazmundy sóz sóılep, Ádiletti Qazaqstannyń aldaǵy saıası-ekonomıkalyq, rýhanı-ıdeologııalyq baǵdaryn aıqyndap berdi.
Mádenıet jáne aqparat mınıstrliginiń «Esik» memlekettik tarıhı-mádenı mýzeı-qoryǵynyń ujymy Ulttyq quryltaıda kóterilgen máselelerdi qoldaı otyryp, mańyzdy jıynnyń maqsattaryn iske asyrýda júıeli jumys atqaratyn bolady. Bul jolǵy Quryltaıda da Prezıdent elimizdiń tarıhyn jan-jaqty zertteý, tamyry tereń tarıhı-mádenı muralarymyzdy qorǵaý máselelerine erekshe toqtaldy.
Bıyl Joshy ulysynyń negizi qalanǵanyna 800 jyl tolyp otyr. Memlekettiligimizdi aıqyndaıtyn osynaý tarıhı data keń kólemde atalyp ótilmek. Bul oraıda Memleket basshysy tól tarıhymyzǵa shynaıy kózben qarap, ulttyq sana men qoǵamdyq qundylyqtardy jańǵyrtýdyń mańyzdylyǵyn atap ótti.
Quryltaıda sóılegen sózinde Prezıdent: «Biz baı tarıhı-mádenı muralarymyzdy saqtaý úshin arheologııa salasynda tártip ornatýymyz kerek», deı kele elimizde kásibı arheologterdiń tapshy ekenin, arheologııalyq qazba júrgizý úshin lısenzııa berý isinde sheshimin tappaǵan túıtkilder bar ekenin atap ótti. Osy oraıda Memleket basshysy tarıhı-mádenı mura sanatyna kiretin nysandarǵa restavrasııa jasaý isin retke keltiretin sharalardy kúsheıtý jáne tarıhı jádigerlerimizdi shetel murajaılarynan Qazaqstanǵa qaıtarý jumystaryn jandandyrý qajettigin aıtty. Bul baǵytta «Esik» memlekettik tarıhı-mádenı mýzeı-qoryǵynyń ǵalymdary sheteldik mamandarmen birlesip arheologııalyq zertteý jumystary men qundy jádigerlerdi saqtap, nasıhattaýda nátıjeli jumystar atqaryp keledi.
Quryltaıda aıtylǵan keleli oılar men usynys-pikirlerden túıgenimiz: tarıhı-mádenı qundylyqtarymyzdy jańǵyrtý – ulttyq biregeıligimizdi nyǵaıta túsetini sózsiz.
Memleket basshysy memlekettik tilimizdiń qoldaný aıasyn keńeıtý, jastardyń patrıottyq tárbıesin kúsheıtý, olardy kitap oqýǵa, bilim, ǵylymǵa yntalandyrý máselelerine aıryqsha mán berýge shaqyrdy. Quryltaıda Ádiletti Qazaqstan qoǵamyn damytý úshin tártip pen zań ústemdigin qamtamasyz etý, azamattardyń quqyǵyn qorǵaý máseleleri de nazardan tys qalmady. Prezıdent aıtyp ótkendeı, elimizdiń endigi ustanatyn basty baǵyty – «Ádiletti Qazaqstan – Adal azamat – Ozyq oıly ult» qaǵıdasy.
Mádenı-gýmanıtarlyq salanyń jáne ıdeologııanyń jańa baǵdary aıqyndalǵan úshinshi Quryltaı barshamyzǵa úlken mindet júktep otyr. Bul – birinshi kezekte bizdiń ulttyq biregeıligimizdi nyǵaıtý jáne elimizdi qarqyndy damytý úshin óte mańyzdy.
Gúlmıra MUHTAROVA,
«Esik» memlekettik tarıhı-mádenı mýzeı-qoryǵynyń dırektory
