Shanhaı yntymaqtastyq uıymyna múshe memleketter dostyq qarym-qatynasty nyǵaıtýǵa, san-salany damytý arqyly halyqtyń ómir sapasyna áser etetin bastamalardy birlesip iske asyryp keledi. Sonyń ishinde densaýlyq saqtaý salasynda tájirıbe almasyp, turǵyndardyń ómirin uzartýǵa septesetin ortaq maqsat-muratqa talpynysy qýantady. Muny forýmda Shanhaı yntymaqtastyq uıymy Bas hatshysynyń orynbasary Nuran Nııazalıev, Dúnıejúzilik densaýlyq saqtaý uıymy (DDU) Eýropalyq óńirlik bıýrosynyń dırektory doktor Hans Klıýge atap ótti.
– Shanhaı yntymaqtastyq uıymynyń jyldan-jylǵa damyp kele jatqanyn baıqaımyz. Uıym músheleri kópjaqty kelisimder arqyly aımaqtyń áleýmettik-ekonomıkalyq áleýetin nyǵaıtýǵa kúsh salyp jatyr. Densaýlyq saqtaý salasynda da ilgerileý bar. ShYU-nyń strategııalyq josparlarynyń áleýeti joǵary. Sonyń ishinde sapaly medısınalyq qyzmettiń qoljetimdiligin arttyrý, medısına salasyn sıfrlandyrý, medısınalyq týrızmdi damytý, farmasevtıkadaǵy baılanysty ilgeriletý, dástúrli medısınamen qatar tótenshe jaǵdaılarǵa qatysty sheshimderdi keńeıtýge kóńil bóledi.
Izinshe Densaýlyq saqtaý mınıstri Aqmaral Álnazarova densaýlyq saqtaý salasyndaǵy jetistikterdi tizbektep, ShYU-ǵa múshe memleketterge tabys tiledi.
– Osy sátte Qazaqstannyń densaýlyq saqtaý júıesi, halyqaralyq tájirıbeler jaıynda habarlaǵym kelip tur. Bizde aýyl-aımaqtardy sapaly medısınalyq kómekpen qamtý úshin qashyqtan qyzmet kórsetý, kóshpeli medısınalyq keshender men medısınalyq poıyzdar iske qosylǵan. Aýyldyq densaýlyq saqtaý salasyn modernızasııalaý maqsatynda Ulttyq joba bekitilgen. Eki jylda alǵashqy medısınalyq-sanıtarlyq kómek kórsetetin 655 nysan ashylady. Osyǵan qosa dári-dármektiń qoljetimdigin arttyrý maqsatynda ishki naryqta otandyq óndiristiń úlesin 50%-ǵa jetkizý kózdelgen. Búgingi kezdesýge jıylǵan áriptesterdiń osy baǵyttaǵy mol tájirıbesin eskere otyryp, medısınalyq ónimder men quraldardy Qazaqstan aýmaǵynda óndirý boıynsha kelisimderge daıyn ekenimizdi jetkizgim keledi, – dedi A.Álnazarova.
Sonymen qatar Prezıdenttiń ǵylym jáne ınnovasııalyq máseleler jónindegi keńesshisi Kúnsulý Zakarııa koronavırýs pandemııasy tusynda qabyldanǵan jedel sheshimderdi eske salyp, ǵylymdaǵy jetistikterge, bıologııalyq qaýipsizdik baǵytyndaǵy ortaq máselelerge toqtaldy. Sózin túıindeı kele ShYU-ǵa múshe elderdi Prezıdent Qasym-Jomart Toqaevtyń Bıologııalyq qaýipsizdik jónindegi halyqaralyq agenttik qurý týraly usynysyn qoldaýǵa shaqyrdy. Atalǵan agenttik qurylsa, halyqaralyq kelisimderdi nyǵaıta otyryp, bıofarmasevtıkany damytýǵa yqpal etedi.
Keńeste Reseı Federasııasy Densaýlyq saqtaý mınıstriniń orynbasary Andreı Plýtnıskıı, Tájikstan Densaýlyq saqtaý jáne áleýmettik qorǵaý mınıstriniń orynbasary Amır Amırzoda, О́zbekstan Densaýlyq saqtaý mınıstriniń mindetin atqarýshy Asılbek Hýdaıarov, ózge de tulǵalar saladaǵy jańashyldyqtar, halyqaralyq tájirıbe jóninde baıandady.
Osy kúni ShYU-ǵa múshe elderdiń delegasııa basshylarymen ekijaqty kezdesý ótti. Mysaly, DDU Eýropalyq óńirlik bıýrosynyń dırektory, doktor Hans Klıýgemen kezdesý barysynda kadr daıarlaý, MSAK-tiń jańa standarttaryn engizý, dárilik zattardy tańbalaýmen qatar Aral basseıni aýmaǵynda halyqtyń densaýlyǵyn zertteý úshin tehnıkalyq jáne konsýltasııalyq qoldaý kórsetý jaıy kelisildi. Al О́zbekstannyń Densaýlyq saqtaý mınıstriniń mindetin atqarýshy Asılbek Hýdaıarovpen kezdesýde densaýlyq saqtaý salasyndaǵy áriptestik yntymaqtastyqty jandandyrý, medısınalyq bilim jáne ǵylym uıymdarynyń arasynda jumys tobyn qurý jospary usynyldy. Sondaı-aq taraptar medısınalyq kadrlardy daıarlaý standarttaryn birizdendirý, birlesken ǵylymı jobalar júrgizý, zamanaýı tehnologııalardy, erte skrınıngterdi qoldaný, ımportty almastyrý boıynsha tájirıbe almasý týraly kelisimge kelgen.
