Sýretterdi túsirgen – Erlan OMAR, «EQ»
Astana qalasy Investısııalar jáne kásipkerlikti damytý basqarmasy basshysynyń orynbasary Maqsat Jańabaev bas qalada Naýryz meıramyn jalpyhalyqtyq sıpatta merekeleýge barlyq jaǵdaı jasalyp, birneshe orynda túrli oıyn-saýyq is-sharalary ótip jatqanyn aıtty. «Bıyl áz Naýryz meıramyna Memleket basshysy Qasym-Jomart Toqaevtyń bastamasymen aıryqsha mán berilip, joǵary deńgeıde atalyp ótilýde. On kún boıy toılanatyn ulyq merekemizge oraı Astanada halyqaralyq jármeńke ashyldy. Munda О́zbekstannan kelgen qolóner sheberleri ózindik órnegimen daralanatyn ydys-aıaq buıymdaryn usynsa, Irannyń temirden túıin túıetin sheberleri ózderiniń mystan quıylǵan dúnıelerin ákeldi. Túrkııadan kelgen sheberler qyshtan qashaǵan qumyra syndy qundy jádigerlerimen tamashalaýshylardy tańǵaldyrdy. Buryn-sońdy elimizde Naýryz merekesine oraı túrkitildes halyqtardyń jármeńkesi ótken joq. Mádenıet jáne aqparat mınıstrliginiń shaqyrtýymen kelgen sheberlerdiń buıymdaryn jergilikti turǵyndar tek kórip, kózaıym bolýmen shektelmeıdi, satyp alýyna da múmkindigi bar. EKSPO halyqaralyq kórme ortalyǵyndaǵy jármeńkeni tamashalaýshylar úshin barlyq jaǵdaı jasalyp otyr. Jastardyń sýret salýyna múmkindik bar, shetelden kelgen qolóner sheberlerimen tájirıbe almasyp, sheberlik sabaǵyn da alady», dedi M.Jańabaev.
«Astanada ótip jatqan kórmege kóneden kele jatqan qolóner buıymy sanalatyn mystan ádiptelgen quman, qumyra syndy ydystardy ákeldim. Temirden buıym jasaý ónerimen meniń atam, onyń ákesi – uly babam shuǵyldanǵan eken. Qazaqstanǵa alǵash kelýim, alǵan áserim erekshe. Buǵan deıin álemniń 30-ǵa jýyq elinde buıymdarymdy kórmege usyndym. Eńbegim elenip, IýNESKO-nyń arnaıy syılyǵymen marapattaldym», dedi Irannan kelgen sheber Násir Lútfı.
Túrkııalyq qumyra jasaýshy Ahmet Tashúnji qyshtan qashap, otqa kúıdirip jasaǵan buıymdary álemde óte joǵary baǵalanatynyn aıtty. 2019 jyly Italııada qolóner sheberleriniń arasynda ótken baıqaýda Ahmettiń qysh qumyrasy 35 eldiń arasynan úzdik dep tanylǵan. Túrkııanyń Izmır qalasynda turatyn sheber qyshtan buıym jasaý erekshe damyǵanyn, básekelestik joǵary ekenin jetkizdi. Tipti qymbat qumyrasy 3 myń dollarǵa satylǵanyn da maqtanyshpen aıtty. «Qazaqstannyń jerin basqanda ózimniń topyraǵymda júrgendeı áserde bolamyn. Múmkin baýyrlas el bolǵandyǵymyzdan shyǵar. Eýropa elderiniń kórmelerine buıymdarymdy aparamyn. Atajurttan halyqaralyq jármeńkege shaqyrtý kelgende erekshe qýandym», dedi Ahmet Tashúnji. Qyrǵyzstannan kelgen ismer Nurııa Isakova Talas shaharynda turady eken. Qolóner buıymdarynyń ishinde áıel zatyna arnalǵan kıimderdi kesip-piship, toqýdy kásip etip kele jatqanyna 40 jyldyń júzi bolypty. Ájesinen, anasynan úırengen ismerlik ónerdi óristetý maqsatynda jastardy da oqytatynyn aıtty. «Qazaqstanda Shyǵys halyqtarynyń tól merekesi sanalatyn áz Naýryzdy merekeleý joǵary deńgeıde ótip jatqany qýantty», dedi Nurııa Isakova.
Astanadaǵy ıgi sharada tek qolóner sheberleri ǵana emes, otandyq azyq-túlik óndirýshiler de óz ónimderin usynyp, jármeńkeniń kórigin qyzdyrdy. Ár óńirden fermerler 200 tonnadan astam azyq-túlik ákelgen. Onyń ishinde et-sút ónimderi, jemis-jıdek, baly, balyq ónimderi bar.
