Sýretti túsirgen – Rýslan Kadyrov
Gaz jelisine qosylý saltanatyna aýdan ákimi Eldos Ahmetov, oblystyq turǵyn úı-kommýnaldyq sharýashylyq basqarmasynyń basshysy Aıdos Beketaev, merdiger kompanııalardyń ókilderi jáne aýyl turǵyndary qatysty. Mataı Baıysov quramyna kiretin Qarabulaq aýyldyq okrýginiń ákimi Serjan Ońalbaev turǵyndardy quttyqtap, olardy bıyl kóp qýanysh kútip turǵanyn jetkizdi.
«Memleket basshysynyń tapsyrmasyna saı eldi mekendegi turǵyndardyń kógildir otynǵa qoljetimdiligin arttyrýǵa kúsh salyp jatyrmyz. M.Baıysov aýylynyń turǵyndary kóktemniń shýaqty sátinde bir qýanyshqa kenelse, jyl sońyna deıin saltanatty is-sharalarymyz kóp bolmaq. Máselen, 15 jyldan asa qaraýsyz qalǵan ǵımaratty jóndep, balabaqshaǵa aınaldyryp jatyrmyz. Sonymen qatar jýyrda balalar oıyn alańqaıy salynady. Munyń bárin árbir turǵynnyń qolaıly ortada ómir súrýine jaǵdaı jasaýǵa umtylǵan qadam dep túısingen abzal», dedi S.Ońalbaev.
Munan soń aýyl belsendisi Ábdikárim Kaımýldınov sóz alyp, gaz jelisin tartqan merdiger «Remstroı» seriktestiginiń basshylyǵyna, qyzmetkerlerine alǵys bildirdi. Aýyl turǵyndary atynan kompanııa ókilderine shapan jaýyp, iltıpat etti.
Baqtybaı eldi mekeninde qýanyshty kún boldy. 2021 jyly bastalǵan gazdandyrý jumysy aıaqtalyp, qazir turǵyndar kommýnaldyq jaılylyqty sezine bastady. Bul is-sharada aýdan ákimi Eldos Ahmetov turǵyndardy quttyqtap, aýdandaǵy gazdandyrý jumystaryn tarazylady.
«Aýdanymyzdaǵy 33 eldi mekenniń 21-i gazdandyrýǵa jatady. Qazir 5 eldi mekenge kógildir otyn jetkizildi. Sonymen qatar 11 eldi mekendi gazdandyrý jumystary júrgizilip jatyr. 3 eldi mekenge jobalyq-smetalyq qujattama ázirlenýde. 2025 jyldyń sońyna deıin aýdannyń 41 myń turǵyny bar 21 eldi mekeni tabıǵı gazǵa qol jetkizedi. Memleket basshysy aıtqandaı, «Barshaǵa teń múmkindik týdyrý – basty ustanym», dedi E.Ahmetov.
Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, eki aýyldy gazdandyrý jobalaryn júzege asyrýǵa bıýdjetten 1,4 mlrd teńgeden asa qarjy bólinip, 110,5 shaqyrym gaz qubyry tartylǵan. Sol sııaqty aýdannyń 10 aýylyna da gaz qubyrlary tartylyp jatyr. Jyl sońyna deıin birtindep Kókjazyq, Terekti, Qaratal, Jańalyq, Shymyr, Jetisý, Jastar, Abaı, Eshkiólmes, О́tenaı aýyldarynyń turǵyndary gazǵa qol jetkizedi dep josparlanyp jatyr. Sondaı-aq Aqtasty, Qaınarly, Jalǵyzaǵash eldi mekenderin gazdandyrýdyń jobalyq-smetalyq qujattamasy ázirlenýde. Osyndaı jumystardyń nátıjesinde 2025 jyldyń sońyna deıin oblystaǵy gazdandyrýǵa jatatyn 21 aýyldyń 40 myńnan asa turǵyny kógildir otynǵa qol jetkizedi.
Baqtybaılyq Dıdar Razıevtiń úıi jýyrda ǵana gaz jelisine qosylǵan. Aıtýynsha, bir taýqymetten arylypty. Jergilikti atqaminerlerge alǵaýsyz alǵysyn jaýdyrdy.
Aıta ketetin jaıt, osy kúni Qaratal aýdanynda da qýanyshty jańalyq boldy. Úshtóbe qalasyndaǵy gaz taratý jelileriniń qurylysy 2022 jyldan beri júrgizilip keledi. Quny 7 mlrd teńge bolatyn joba 2024 jyldyń qyrkúıek aıynda aıaqtalady. Búginde mundaǵy jumystar 90,5 paıyzǵa támamdalǵan. Mereke qarsańynda Úshtóbe qalasynyń shyǵys bóligin gazben qamtýǵa baǵyttalǵan iske qosý kesheni óz jumysyn bastady. Osy qondyrǵy nátıjesinde aýdan ortalyǵynyń 40 paıyzy kógildir otynǵa qol jetkizedi.
Jalpy, Qaratal aýdanynda 35 eldi mekenniń 19-y gazdandyrýǵa jatady. Búginde 2300-den asa turǵyny bar Oıan jáne Kálpe aýyldarynyń turǵyndaryna kógildir otyn jetkizildi. Jyl sońyna deıin oblystaǵy Jańatalap, Eskeldi bı, Kókdala, Qyzyljar, Dostyq, Tastóbe, Ortatóbe, Bastóbe, Kókpekti, Sarybulaq sııaqty 10 aýyldy kezeń-kezeńimen gazdandyrý josparlanyp jatyr.
Jetisý oblysy
