Aıtýly is-shara Naýryznamanyń Yntymaq kúnimen qatar keldi. О́ńir basshysy jınalǵandardyń barlyǵyn Naýryz meıramymen quttyqtap, jańa qonys ıelerine baqyt tiledi.
– Memleket basshysy Qasym-Jomart Toqaev halyqtyń ál-aýqaty men ómir súrý sapasyn arttyrý basty mindet ekenin árdaıym aıtyp keledi. Sonyń ishinde ár otbasyn turǵyn úımen qamtamasyz etýge baǵyttalǵan bastamalar erekshe mańyzǵa ıe. Búginde Oral qalasynda memlekettik baǵdarlamalar arqyly 14 kóppáterli úı salynyp jatyr. Memlekettik baǵdarlama aıasynda salynǵan kópqabatty turǵyn úıler «Otbasy bank» arqyly kezekte turǵandarǵa jeńildetilgen paıyzdyq nesıemen beriledi. Búgin de osy baǵdarlama arqyly kezekte turǵan 80 otbasy baspanaly boldy. Jańa páter ıelerin quttyqtaımyn, – dedi óńir basshysy.
Prezıdent tapsyrmasy boıynsha elimizde «Qýatty óńirler – el damýynyń draıveri» jobasy qolǵa alynǵan edi. Jańa turǵyn úı qurylysy osy joba aıasynda júzege asqan. Batys Qazaqstan oblysy ákiminiń baspasóz qyzmeti habarlaǵandaı, baspanaly bolǵandardyń kópshiligi – múmkindigi shekteýli, sondaı-aq páter kezeginde turǵan jandar.
– Kóp jyl kezekte turdyq. Endi, mine, armanymyz oryndaldy. Memleketke rızamyz. Bıylǵy Naýryz meıramyn jańa páterde qarsy alatynymyzdy oılasaq, qýanyshymyzda shek joq, – dedi jańa páter ıesi Nurgúl Esenalıeva.
Aıta keteıik, Oral qalasynda bıyl 1400-den asa jańa páter paıdalanýǵa berilmek.
Batys Qazaqstan oblysy
