Aqparattyq júıe ınjeneri mamandyǵyn meńgerip, eńbek jolyn jeke kompıýterlik klýbta bastaǵan Janmurat Aldońǵardyń da taǵdyry keıin «Teńizben» toqaılasqan. Bilikti maman ken ornynda materıaldarmen qamtamasyz etý jónindegi úılestirýshi bolyp 10 jylǵa jýyq jumys istedi. Kofe, shaı quıatyn qaǵaz stakan jasaıtyn kásip ashýǵa bekingeni de sol kez.
Árıne, qaı isti bastaýǵa sebepshi bolatyn jaıt bar. Kenish ornynda jumys isteıtinderge túske deıin, túski astan soń shaı men kofe ishýge 15-20 mınýt úzilis beriletin. Sonda sýsyndar 200 mıllıgrammdyq qaǵaz stakanmen usynylady. Bul – bir ret qoldanylatyn ydys. Onyń syrtynda «Túrkııada shyǵarylǵan» dep jazylǵan.
«Osyndaı ydysty ózimizde shyǵarýǵa bolmaı ma?», «Bul isti qolǵa alyp kórsem qalaı bolar eken?» degen saýaldar týyndap, oıymnan shyqpaı qoıdy. Sóıtip, bul óndiristiń tıimdi tustaryn, shyǵynyn zertteı bastadym. Keıin jeke kásip ashýǵa birjola sheshim qabyldadym. Árıne, bári birden ońǵaryldy deýge bolmaıdy. Aldymen áleýetti qamtýshylarmen kelissóz júrgizip, Qytaıdan qajetti jabdyqtar satyp aldym», deıdi Janmurat Aldońǵar.
Muqııat daıyndyqtyń nátıjesinde, bes jyl buryn úıiniń aýlasynda qaǵaz ydys shyǵaratyn seh ashqan. Bastapqyda sehqa bir stanok ornatypty. Qazir tórt adamdy turaqty jumyspen qamtyp otyr. Olar 8 saǵattyq eki aýysymmen jumys isteıdi. Al 2021 jyly memleketten 4 mıllıon teńgeniń qaıtarymsyz grantyn ıelenip, taǵy eki stanok satyp alǵan. Onyń biri 200, ekinshisi 250 mıllıgramdyq stakan shyǵarýǵa arnalǵan.
«Qaǵaz ydys elimizde shyǵarylsa, baǵasy arzan bolady. «Teńiz» ken ornyndaǵy merdiger kompanııalarǵa sapaly ári tym qymbat emes ónim qajet. Qazir ken ornyna merdigerlikke tartylǵan tórt kompanııa menen qaǵaz ydys alady. Taǵy bir tapsyrys berýshi – Batys Qazaqstan oblysyndaǵy munaı kompanııasy», deıdi J.Aldońǵar.
Aıtýynsha, úsh stanokpen aıyna 4 mıllıonǵa jýyq qaǵaz ydys shyǵarylady. Sonyń 1,5 mıllıon danasy aı saıyn «Teńiz» ken ornyna jiberiledi.
«Qaǵaz ydys shyǵarý úshin «Qazaqstanda jasalǵan» lısenzııasyna qol jetkizdim. Bul «Teńiz» ken ornyndaǵy barlyq merdiger kompanııaǵa otandyq ónimdi usynýǵa septigin tıgizdi. Buryn «Teńiz» ken ornynda jumys istegen qyzmetker edim. Endi ózim osyndaǵy kompanııalarǵa merdiger bolyp otyrmyn. Merdigerler otandyq taýardy satyp alýǵa qoldaý bildirdi. Qazir keıbiri 300 mıllıgramdyq stakanǵa tapsyrys berdi. Jaqyn arada 300, 350, 450 mıllıgramm stakandardy shyǵaratyn stanoktar satyp alýdy kózdep otyrmyn», deıdi kásipker.
Atyraý oblysy
