Aıshyqty mereke

«Mádenıet jáne ulttyq salt-dástúr» kúni san túrli saltymyzdy, tárbıelik máni tereń dás­túrlerimizdi kórsetsek, «Sha­ńyraq» kúni elý-alpys jyl otasqan úlgili otbasylar arasyn­da saıys ótti. «Ulttyq kıim» kúni oıýly kamzol-beshpetterin kıdi. Kópshilik ıyqtaryna jarasa ketken ulttyq naqyshtaǵy shapandaryn kúndelikti kıip júrýdi ádet qyldy. On kúndiktiń aıasynda ulttyq sport ta keńinen nasıhattaldy. «Yntymaq» kúni bir shańyraq astyndaǵy kóp ulttyń bereke-birligin aıshyqtaıtyn sharalar ótti. Aınalyp kelgende, bul kúnderi qazaqtyń rýhanı baılyǵyn kórsetýge baǵyttalǵan is-sharaǵa toly boldy.

Ásirese óndirisi órkendep tur­ǵan Rıdder qalasynda bıylǵy Naýryz erekshe qarqynmen toı­landy. Ulystyń Uly kúni qarsańynda Rıdderdiń ortalyq ala­ńynda on shaqty aq shańqan kıiz úı tigildi. Sáni men máni, na­qyshy aıshyqtalǵan ár kıiz úı taqyryptyq baǵytta qu­ryld­y. Eldik pen birlikti aıqyn­daǵan Naýryz merekesiniń basy Rıdder qalasynyń barlyq iri kósheleri men dańǵyldaryn qamtyǵan 30 salt atty sarbaz Mem­lekettik Týdy jelbiretip erekshe sán berdi. Ulys kúniniń basty keıipkeri – Qydyr ata qasıetti qyran qusy jáne umaı tazysymen el aldyna shyqty. Shuǵylaly kóktemniń shyraıy Naýryz-arý sán saltanatymen barsha jurtty tamsandyrdy. Sondaı-aq quralaıdy kózge atqan sadaqshylar da mergendikterin kórsetti.

Jalpy, Naýryznama 10 kún­diginde Rıdder qalasynda 300-den astam merekelik is-shara ótken.

Naýryz kúni sahna tórinde jergilikti jáne ob­lys ónerpaz­darymen qatar, ar­­naıy qonaqtar Dıana Sharapova, Oleg Nıkıtın jáne Ulanǵasyr Qamı bastaǵan ánshiler qa­lany ánge bóledi. Toı­shyl qaýym án tyńdaı júrip, qol­óner she­berleriniń kórme­le­rin tamashalady.

Jyl basyn qarsy alysqan rıdderlikter ertesinde «Tazalyq kúni» dep, qaladan 10 shaqyrym jerge baryp, ulttyq tabıǵı qoryq aýmaǵyndaǵy qalyń qar astynda qalǵan bulaqtyń kózin ashty. Tabıǵat pen adamzattyń ózara úndestigin aıshyqtaǵan bul shara jas urpaqty tazalyqqa, qorshaǵan ortany qorǵaýǵa úı­retedi.

Beıbitshiliktiń besigi bolǵan ıgi bastamaǵa qaladaǵy 12 etno­mádenı ortalyqtyń ókilderi, jastar jáne qarııalar da belsene qa­tysty. «Jolaýshy bolsań, osy aq bulaqtaı taza bol!» uranymen ótken is-shara munymen shektelip qalmaıdy. Qala basshylyǵynyń josparyna sáıkes, qardyń kóbesi sógilip, jer kepken soń sol bu­laqtyń mańy tazalanyp, abattandyrý jumystary júrgiziledi. Keıin bul jer jolaýshylap kele jatqan adamdar toqtap sý iship, tamasha tabıǵat aıasynda demalatyn orynǵa aınalady. Qala basshylyǵynyń jospary sol.

Aıta keteıik, dál osyndaı ıgi sharalar oblystyń ózge óńir­lerinde de uıymdastyryldy. О́skemenniń ózindegi Naýryz me­re­kesi de óte joǵary deńgeıde ótti. Esikteri aıqara ashylǵan ár kıiz úıden halyqqa ulttyq ta­ǵamdar usynylyp, naýryzkóje sapyrylyp jatty. Arqa-jar­qa jurt «jyl jaıly bolsyn» dep, bir-birine aq tilekterin jaý­dyrdy.

Shyǵys Qazaqstan oblysy