Sýretti túsirgen – Rýslan Kadyrov
Ár ulttyń dástúrli qundylyqtary – sol ulttyń qoltańbasy sekildi, buǵan ádet-ǵurpyn, salt-sanasyn, kıimin qosýǵa bolady. Jyl sanap jurt ishinde suranys artqanymen, belgili bir meıramdarda ǵana tutynatyny bizdi qynjyltady. El Prezıdentiniń «Ulttyq kıimniń ózi – ult mádenıetiniń jarqyn kórinisi. Sondyqtan ul-qyzdarymyz ulttyq kıimdi Naýryz meıramynda ıa bolmasa basqa merekelerde jıi kıip júrse, keremet bolar edi», deýi de bul istiń máselege aınalǵanyn ańǵartady. Degenmen óńir-óńirlerde rýhy bıik, baba bolmysynan ajyramaǵan aǵaıyn bar. Biz mysalǵa alǵan «Jetisy» basylymy kópke úlgi.
«Ata basylym ulttyq kıim kııý osydan bes-alty jyl buryn bastalyp, Naýryz aıynyń basynan sáýirge deıin jalǵasyp, jarasym taýyp, dástúrge aınalyp ketken. Kúle qaraǵandar da, synaı qaraǵandar da, unata qaraǵandar da boldy. Mundaı pikirler – sholaq oılap, asyǵys saralaýdan týǵan oıdyń nátıjesi. Sebebi ulttyq kıimge degen qurmetińiz ishki mazmunyńyzdyń qandaı ekenin bildiredi. Jan dúnıemizdi qazaqty súıý sezimi erekshe bılese, onda kez kelgen ulttyq qundylyqqa beıjaı qaramaıtyn edik. Jaratýshy bizdi «qazaq» qylyp jaratqan eken, endeshe basqa ulttan tilimiz, salt-dástúrimiz, ádet-ǵurpymyz, ulttyq taǵamdarymyz ben kıimderimiz arqyly erekshelenip turmaımyz ba?», deıdi basylym basshysy Jumataı Ospanuly.
Jalpy, gazet ujymynyń aýyzbirshiligi, kishiniń úlkenge izeti, úlkenniń kishige qurmeti kóńil súıindiredi. Aptalyq jumystyń sońǵy kúni «Juma shaı» uıymdastyryp, rýhanı áńgime aıtylady. Quran oqylyp, esti estelikterdiń tıegi aǵytylady. Bul da ulttyń ustynyna aınalǵan únparaqtyń kelbetin ajarlandyra túsetin ádet.
«Qazaqsha kıinsek qana ulttyq bolmysymyz ben rýhymyz asqaqtap turady degen birjaqty oıdan aýlaqpyn. Syrt kóz suǵyn kóp qadaıtyn aıtýly oryndarda, álemdik dodalar men alys-jaqyn shetelderge baratyn resmı saparlarda, memlekettik qurylymdarda zamanaýı úlgide ulttyq kıim kıip júrý mártebemizdi kótermese, kóleńkesin túsire qoımas. Áıtpese, alamanǵa túsetin báıge atynyń ústine japqan jabýdaı, áz Naýryz merekesinde ǵana kıip, qalǵan ýaqytta kádege jaratpaý ulttyǵymyzǵa syn bolmaı ma?! Endeshe, múmkindigimizshe qazaqy naqyshtaǵy kıimdi kıip júrýdi dástúrge aınaldyrǵanymyz jón», deıdi J.Ospanuly.
Berekesi jarasqan «Jetisy» gazetiniń ujymy óńirdegi ózge de salalarǵa bastama bolyp, qazaqy kıim kııýge jol kórsetkendeı. Qazir B.Quranbek atyndaǵy Jýrnalıster úıinde ulttyq kıim kııý trendke aınalyp keledi.
Jetisý oblysy
