Foto: Ontustik Qazaqstan saıty
Elordada ótetin aıtýly merekege shetelden júz myńnan asa týrıst keledi dep josparlanyp otyr. Bul kóńil qýantady, árıne. О́ıtkeni bul el týrızmine biraz serpin beredi. Derekterge súıensek, Qazaqstan týrızm baǵyty boıynsha 85 eldiń ishinde 84-orynda tur. Osy baǵyt boıynsha Memleket basshysy Qasym-Jomart Toqaev Úkimet pen Parlamentke birqatar tapsyrma bergen. Atalǵan baǵytta atqarylyp jatqan jumys jóninde «Kazakhstan tours» týr agenttiginiń basshysy Ásemgúl Ospanova aıtyp berdi.
– Memleketimiz týrızm salasyna basa nazar aýdaryp, keıingi jyldary aýqymdy is-sharalar qolǵa alynyp jatyr. Jasyratyny joq, birneshe jyl buryn halyqtyń basym kópshiligi shetelge saıahattaıtyn. Shetelden keletin týrıster sany da az edi. Qazir elimizdegi týrıstik jerlerge suranys kóbeıdi. Bul – jaqsy nátıje. Alda bolatyn Kóshpeliler oıyny da týrızm salasyna tyń serpilis ákeledi dep esepteımin. Sebebi elimizge myńdaǵan týrıstiń bir mezette kelýi – sırek bolatyn jaǵdaı. Bul oıyndarǵa bizdiń qyzmetkerler daıyndyqty bastap ketti. Elimizdegi kórikti jerlerdiń tizimin jasap, ártúrli baǵyttaǵy ekskýrsııany ázirlep otyrmyz. Týrısterge qazaq, orys, aǵylshyn jáne arab tilinde qyzmet kórsetemiz. Bastysy shetelden keletin qonaqtarymyzdy qyzyqtyra alýymyz kerek. Sol sebepti áleýmettik jelilerdi belsendi júrgizip jatyrmyz, – dedi Á.Ospanova.
Kóshpeliler oıyndary eldiń týrıstik áleýetin arttyryp, saladaǵy kásipkerlik qyzmetti jandandyrýǵa serpin beretini sózsiz. Sonymen qatar kásipkerlerdiń jańa naryqqa, jańa keńistikke shyǵýyna múmkindik beredi. Olaı deıtinimiz, týrızm – qyzmet kórsetýden basqa, eldiń ekonomıkalyq, rýhanı áleýetin arttyratyn faktorlardyń biri. Álem qyzyǵa qaraıtyn bul oıyndar kezinde týrısterdiń qaýipsizdigi de mańyzdy. Bul jóninde V Dúnıejúzilik kóshpeliler oıyndaryn daıyndaý jáne ótkizý jónindegi dıreksııa basshysynyń orynbasary Abylaı Qondybaevpen áńgimelesken edik.
– Oıynǵa qatysýshylardyń, qyzmet kórsetýshi taraptyń jáne kórermenderdiń qaýipsizdigi – V Dúnıejúzilik kóshpeliler oıynyn uıymdastyrýdaǵy negizgi ustanymdardyń biri. Dúnıejúzilik aýqymdy is-sharaǵa daıyndyq jumystary josparǵa saı tıisti deńgeıde júrip jatyr. Astana jáne Almaty sııaqty iri qalalarda qyzmet kórsetý, demalys oryndary men mádenı oshaqtar, tamaqtaný, qonaqúı qyzmeti, kólik pen qaýipsizdik máseleleri júıeli túrde sheshilgen. Desek te, Astana qalasy ákimdigi, Ishki ister mınıstrligimen, Ulttyq qaýipsizdik komıteti, Qorǵanys mınıstrligi jáne memlekettik kúzet qyzmetimen birlese otyra oıyn ótý kezinde tolyq qaýipsizdikti qamtamasyz etý is-sharalary boıynsha jospar quryldy. Saıys bolatyn barlyq sporttyq nysan is-shara bastalmas buryn aldyn ala arnaıy tekserýden ótkiziledi. Nysan aýmaǵyna qarasty barlyq jer arnaıy quraldarymen jáne qol júgin tekseretin qondyrǵylarmen jabdyqtalady. Oıyndardy basqarý ortalyǵy qurylady. Osy rejim arqyly beınekameralar men arnaıy qurylǵylar ornatylyp, sıfrlyq tehnologııanyń múmkindigin barynsha qoldanbaqpyz. Qoǵamdyq qaýipsizdikten bólek taǵy bir úlken ról atqaratyn ol – tótenshe jaǵdaılardyń, órt qaýipsizdiginiń aldyn alý. Bul úshin arnaıy tehnıka men tıisti qyzmetterdiń beketteri qoıylady, – dedi A.Qondybaev.
Endeshe, qyrkúıek aıynyń 8-14 aralyǵynda ótetin oıyn týrızm salasyna jańa lep alyp keledi dep oılaımyz.
Erkenaz QORDABAI,
L.N.Gýmılev atyndaǵy EUÝ stýdenti