Tótenshe jaǵdaılar jónindegi departamenttiń málimetine qaraǵanda, qarǵyn sýǵa qarsy áreketter belsendi júrgizilip jatyr. Jergilikti atqarý organdarymen úılestirilgen jumystardyń nátıjesinde, jyl basynan beri 1 mln 626 myń tekshe metr qar shyǵarylǵan. Sonyń ishinde ótken aptada ǵana 301 myń tekshe metr qar syrtqa tasylǵan. Sý aǵatyn 2 082 qubyr tazalanǵan. Sondaı-aq 116 shaqyrym aryq ta tazartylyp, sýdyń júrýine kedergi bolatyn qar men qoqystardan arshylǵan. О́tken aptada ǵana 30 shaqyrym aryq tazalanypty.
«Jyl basynan beri eldi mekenderde qum-topyraq salynǵan 23 667 daıyndaldy. Bul jumys ótken aptada jedel qolǵa alynyp, bir aptada munyń 12 myńdaıy daıyn boldy. Departament qyzmetkerleri qarǵyn sý basyp ketýi múmkin ýchaskelerge top-tobymen bólinip, áreket etýge daıyn otyr. Buǵan qosa qajetti tehnıkalar da saılaýly», dedi TJD-nyń baspasózben baılanys bóliminiń qyzmetkeri Evgenıı Jýravlev.
26 naýryz kúni Ǵ.Músirepov aýdanyndaǵy Sharyq ózenindegi muz keptelisiniń aldyn alý maqsatymen Raısovka aýylynda, Aqanburlyq ózeni arqyly ótetin Grıgorev kópiri aýdanynda, Aqanburlyq pen Esil ózenderiniń túıisken jerinde, jáne Chıstopole aýylynyń janynda muz jarý jumystary júrgizildi. Muzdyń jalpy aýdany 1 200 sharshy metrdi qurady. 160 kg jarylǵysh zattar paıdalanyldy. Bul – seń keptelisin boldyrmaı, sýdyń erkin aǵýy úshin jasalyp jatqan sharalar.
Alaıda halyqtyń kóńili kúpti ekenin jasyrýǵa bolmaıdy. Qaladaǵy qardy kún «mújip» azaıta bastaǵanymen, áli de kóp. Onyń ústine jeltoqsanda erigen qardan qatqan muz toń bolyp, qardyń astynda siresip jatyr. Úılerdiń kóleńkesinde jatqan qarǵa kúnniń kózi jetpegen. Bir kezde kúrt erise, úılerge sý kirý qaýpi bar. Qarǵyn sýdyń bıyl jerge sińýi qıyn, óıtkeni topyraqtyń ylǵaly byltyr kúz boıy jaýǵan jańbyrmen tolyp tur.
