Foto: senate_kz
Senator joldanǵan saýaldar aýyldy damytý, aýyl sharýashylyǵynda sýdy tıimdi paıdalaný, óńirlerdegi fermerlik sharýashylyqtardy keńeıtý, jaıly mektep, biryńǵaı ulttyq genetıkalyq bank qurý, aýyl turǵyndarynyń qalaǵa kóshi-qon sebepteri, aýyldyq jerlerdegi jaıylym máselelerin kótergenin atap ótti. Alaıda, Janbolat Jórgenbaev depýtattyq saýaldarǵa Úkimet tarapynan kelgen resmı jaýaptar kóńil kónshitpeıtinin tilge tıek etti.
«Is júzinde kóptegen órshil jobalar qaǵaz júzinde ǵana qalyp, birde-bir memlekettik baǵdarlama mejelegen ındıkatorlarǵa qol jetkizilmegen jumystar týraly jazylady nemese «bolady», «suraldy», «josparlanyp otyr» degen standartty jaýaptarmen aıaqtalady. Eń soraqysy, teris nátıje úshin eshkim jaýapqa tartylmaıdy, óıtkeni is júzinde kóp nárse nıet deklarasııasynyń deńgeıinde qalady. Muny nemquraıdylyq nemese sol jaýapty joldaǵan memlekettik qyzmetkerdiń, mınıstrliktiń nemese memlekettik organnyń jaýapty azamatynyń kásibı deńgeıin kórsetedi dep oılaımyn», dedi senator.
Osy oraıda depýtat aýyl sharýashylyǵy men agrobıznestiń damýyn kózdeıtin keshendi baǵdarlama daıyndaý qajettigin nazarǵa alýdy surady.
«Shıkizat óndirisi salalarynyń damýymen qatar, óndirýshi ónerkásiptiń ósýin yntalandyrý maqsatynda respýblıkanyń ekonomıkalyq saıasaty men damý strategııasyn jedel qaıta baǵyttaý qajet. Sonymen qatar ekonomıkany ártaraptandyrý jóninde kásipkerliktiń alatyn orny tóńireginde taǵy bir másele – aýylsharýashylyǵy óndirisindegi shaǵyn jáne orta kásipkerlikti damytý máselesin qaıta qarastyrý qajet. Shaǵyn jáne orta bıznestiń negizgi máselesi - salyqtan bosatý emes, Qazaqstanda tıimdi, áleýetti suranystyń joqtyǵy. Sondyqtan, agrobıznes ortasyn jaqsartý máselesine úlken kóńil aýdarý qajettigi týyndap otyr», dedi Janbolat Jórgenbaev.
Sondaı-aq depýtat Úkimet basshysy Oljas Bektenovtiń atyna saýal joldaı otyryp, osyǵan deıin senatorlar usynǵan usynystardy taǵy da eske salyp, olarǵa nazar aýdarýyn ótindi.
Qyrmyzy JUMAǴALIQYZY,
EUÝ stýdenti
