Máselen, partııanyń Aqtóbe oblystyq fılıalynyń tóraǵasy Erbol Danaǵulov, oblystyq máslıhattaǵy «Amanat» fraksııasynyń músheleri sý basqan aýmaqtarǵa baryp, jaǵdaıdy baqylaýǵa aldy. Partııalyqtar tótenshe jaǵdaılar departamentiniń qyzmetkerleri, áskerı qurylymdar jáne polıseılermen birge kúndiz-túni jumyla jumys istep jatyr. Amanattyqtar kósheleri men aýlalaryn sý basqan turǵyndarǵa kómek kórsetip, sý burý, qum tógý, joldardy sýdan tazartý jumysyna atsalysyp keledi.
Oblys ortalyǵyndaǵy jaǵdaımen tanysqannan keıin Qobda aýdanyna barǵan Erbol Danaǵulov: «Qar men muzdyń kúrt erýi jáne jańbyr eldi mekenderdegi jaǵdaıdy qıyndatyp jiberdi. Qazir aǵys baǵytyn burý, bógeý jumysy júrgizilýde», deıdi.
Aıta keteıik, óńirdegi jastar qanatynyń eriktileri buǵan deıin Temir aýdanynyń ortalyǵy Shubarqudyq kentinde, Muǵaljar aýdanynyń ortalyǵy Qandyaǵash qalasynda bolyp, jergilikti turǵyndarǵa kómek kórsetti. Jastardyń bir legi búginde úıin sý basqan aqtóbelikterge qol ushyn sozyp júr.
Al Qostanaı oblysynda «Jastar rýhy» jastar qanatynyń belsendileri Arqalyq qalasynyń aýmaǵynda sý tasqynynan zardap shekken eldi mekenderge baryp, birneshe kún qatarynan kómek kórsetip júr. Olar jergilikti atqarýshy organdarmen jáne tótenshe jaǵdaılar qyzmetimen birlesip, turǵyndardy qaýipsiz aýmaqqa jetkizý, evakýasııalanǵan adamdarǵa ýaqytsha baspana taýyp berý, qajetti turmystyq zattarmen qamtamasyz etýge járdemdesip keledi. Buǵan qosa, «Jastar rýhynyń» volonterleri gýmanıtarlyq kómek jetkizýge de kúsh salyp jatyr. Eriktiler azyq-túlik, sý, dári-dármek jáne basqa da qajetti zattardy jınap, keıin zardap shekkenderge taratady.
Batys Qazaqstan oblysynda «Amanat»-tyń bastaýysh partııa uıymdarynyń tóraǵalary men músheleri, partııa belsendileri Oral qalasynda, Báıterek, Tasqala, Terekti, Qaratóbe aýdandarynda sý tasqynynan japa shekken turǵyndarǵa kómek kórsetýde. «Jastar rýhynyń» belsendileri táýlik boıy kezekshilikte júrgen tótenshe jaǵdaı departamenti qyzmetkerlerine ystyq tamaq úlestirdi. Sonymen qatar zardap shekken turǵyndarǵa kómek kórsetý maqsatynda partııalastar gýmanıtarlyq kómek jınaýda. Buǵan qosa oblystyq, qalalyq máslıhat depýtattary partııanyń óńirlik fılıaly janynan ashylǵan esepshotqa materıaldyq kómek retinde qarajat aýdaryp jatyr. Partııa fılıaldarynyń qyzmetkerleri de birkúndik jalaqylaryn aýdardy. Gýmanıtarlyq kómektiń alǵashqy legi Qaratóbe aýdanyna jol tartty. Bul kómek tótenshe jaǵdaı rejimi jarııalanǵan barlyq aýdanǵa jetkiziledi.
Abaı oblysynda partııanyń óńirlik fılıalynyń, aýmaqtaq fılıaldarynyń tóraǵalary men atqarýshy hatshylary, partııalyq baqylaý komıssııasynyń músheleri, oblystyq, aýdandyq máslıhattaǵy depýtattyq fraksııa músheleri, «Jastar rýhynyń» eriktileri sý basqan aýmaqtarda atqarylyp jatqan jumystarǵa belsendi aralasyp keledi.
Aıta keteıik, aımaqtaǵy birneshe aýdan men Semeı qalasy mańynda aıdyndardaǵy sý deńgeıi kóterilip, saldarynan kópirler men joldardy, aýlalardy sý basty. Partııalyqtar TJD men IID qyzmetkerleri, áskerı qurylymdar, jergilikti atqarýshy organ ókilderimen birge táýlik boıy kezekshilik atqaryp júr. Olar qaptardy ınertti materıaldarmen toltyryp, bóget qoıyp júr. Sý basqan jol men kóshe, turǵyn úı tusynan aryq qazý, sý burý, sý sorǵyzý, qum tóseý, bóget qoıý jumysy júrip jatyr.
