Foto: bairaq.kz
Osyǵan baılanysty jıyn ótkizgen oblys ákimi Serik Shápkenov aýanyń lastaný sebebin 10 kúnniń ishinde anyqtaýdy tapsyrdy. Ákimniń aıtýynsha, jaýapty organdar 4 saǵattan soń aýa sapasyn zertteýge kirisken. Jaǵymsyz ıisti anyqtaý úshin qajetti sharalardy qolǵa almaǵan jaýapty organdardyń jumysyn synady.
Atyraý oblystyq ekologııa departamentiniń basshysy Álibek Bekmuhamedovtiń aıtýyna qaraǵanda, «Qazgıdromet» RMK-nyń óńirlik fılıaly usynǵan málimette 36 joǵary lastaný jáne 2 ekstremaldy joǵary lastaný deregi tirkelgen.
«Jaǵymsyz ıis Atyraý qalasynyń sol jaǵyndaǵy «Sasyqsaı» býlaný alańynan shyǵýy múmkin dep paıymdap otyrmyz. Munda atmosferalyq aýany joǵary lastaýshy ıngredıent ruqsat etilgen shekti konsentrasııadan 10 ese asqan. Buǵan qosa 24 naýryzda tańǵy saǵat 09.40-ta «Prıvokzalnyı» atmosferalyq aýa sapasyn baqylaý stansasynda kúkirtti sýteginiń ruqsat etilgen shekti konsentrasııadan 97 esege asqany tirkeldi. Bul – ekstremaldy joǵary lastaný», dep málimdedi Á.Bekmuhamedov.
Al «Qazgıdromet» RMK oblystyq fılıalynyń basshysy Salaýat Tólenovtiń aıtýynsha, atmosferalyq aýanyń joǵary jáne ekstremaldy joǵary lastanýy týraly barlyq málimet Atyraý oblysy boıynsha ekologııa departamentine jáne jergilikti ýákiletti organdarǵa ýaqytyly berilip otyrǵan. Alaıda Atyraý munaı óńdeý zaýyty men NCOC N.V kompanııalarynyń aýanyń lastanýyn tirkeıtin stansalary naýryzdyń 24-inen 25-ine qaraǵan túnde lastaný boıynsha derek bermegen.
«Tańǵy saǵat 03.00-den 07.00 aralyǵyndaǵy jaǵdaı týraly málimet berilgen joq. Biz Atyraý munaı óńdeý zaýyty mańyndaǵy turǵyn úıler ornalasqan aýdanyndaǵy atmosferalyq aýanyń sapasyna ólsheýler júrgizdik. Jel soltústik-shyǵystan soqty. «AMО́Z» JShS-nyń oń jaǵyndaǵy qonystaný aımaǵynda kúkirtti sýtektiń mólsheri ruqsat etilgen shekti konsentrasııadan 21-25 esege deıin asty. Bul – aýanyń joǵary lastaný deregi. Al zaýyttyń sol jaǵyndaǵy qonystaný aımaǵynda bul derek 17,5 esege asyp, joǵary lastaný jaǵdaıy tirkelip otyr», deıdi S.Tólenov.
Munaıly shahar turǵyndary áleýmettik jelide kúkirtti sýtektiń ısi NCOC N.V kompanııasynyń Qarabatan eldi mekenindegi zaýyty ornalasqan jaqtan shyqqany týraly shaǵym aıtty. Alaıda konsorsıýmnyń eńbekti qorǵaý jáne qaýipsizdik jónindegi dırektory Ýálıhan Janaısovtyń aıtýynsha, buǵan kompanııanyń esh qatysy joq.
«Biz arnaıy sanıtarlyq qorǵaý aımaǵyna taldaý júrgizdik. Túngi saǵat 01.00-den tańǵy 09.00-ge deıin aýa sapasyn tekserdik. 24-25 naýryzda júrgizilgen tekserý nátıjesinde jeldiń basym baǵyty soltústik-batystan ońtústik-shyǵysqa, ıaǵnı kompanııanyń ken ornyna qaraı soqqan. Jeldiń jyldamdyǵy sekýndyna 2 metr bolǵan. Aýa sapasyn baqylaıtyn barlyq stansanyń deregin alyp, jaǵdaıdy baqylaýda ustap otyrmyz», deıdi Ý.Janaısov.
Oblys ákimi S.Shápkenovtiń pikirinshe, jaǵymsyz ıistiń shyǵý sebebin anyqtaý, tıisti shara qoldaný úshin komıssııa qurylady. Biraq atqarylyp jatqan jumystar jóninde turǵyndarǵa jedel ári ýaqytyly aqparat berilýi qajet.
«Turǵyndar tarapynan aýanyń lastanǵany týraly áleýmettik jelide aryz-shaǵymdar kóp aıtylady. Aýada jaǵymsyz ıistiń shyqqany memlekettik organdardyń jumysyn tıisti deńgeıde atqarmaıtynyn kórsetti. Mamandar bul jaǵdaıǵa baılanysty dereý shara qabyldaýdyń ornyna tórt saǵatta áreń jınaldy. Bizge turǵyndardyń taza aýamen demalyp, deni saý bolǵany qajet. Aýadaǵy jaǵymsyz ıis «Sasyqsaı» býlaný alańynan tarady deımiz. Biraq onyń sýyn tazaladyq. Tipti sol jerge flamıngo ushyp keldi degen aqparat tarady. Al «Kvadrat» alańynda da tazartý jumystary júrip jatyr. Ondaǵy ıis qalany tolyq basýy múmkin emes», deıdi S.Shápkenov.
Ákimniń aıtýynsha, aýanyń lastaný deregin zerdeleıtin komıssııaǵa tıisti mamandar toby tartylady. Al «Qazgıdromet» RMK fılıaly atmosferalyq aýa sapasyn baqylaıtyn stansalardan málimet jınap, taldaý jasaýǵa tıis. Sol jumystardyń negizinde aýany lastaǵan kinálilerge tıisti shara qoldanylýy múmkin.
Biraq bul másele birneshe jyldan beri sheshimin tabar emes. Tipti jyl ótken saıyn ýshyǵyp barady. Endi arnaıy komıssııanyń zerdeleýinen keıin Atyraýdyń atmosferalyq aýasy tazara ma, álde... Munyń bárine tóreshi – ýaqyt.
Atyraý oblysy
