Sýretterdi túsirgen – Erlan OMAR, «EQ»
97 jasyna deıin jurtshylyqqa el anasy deńgeıinde aq batasyn berip, ákesi din ǵulamasy Sadýaqas qajy Ǵylmanıdyń kóp eńbegin jadynda jańǵyrtyp, nasıhattaǵan Úkijan (Múmına) Sádýaqasqyzynyń «Folıant» baspasynan (Astana) shyqqan «О́mirimnen eskertkish» atty murasynyń tusaýkeseri ótti. 40 baspa tabaq eńbek áıgili qazı perzentiniń 11 dápteri negizinde daıyndalǵan. Qurastyryp, alǵysózin jazǵan – fılologııa ǵylymdarynyń kandıdaty, osy ýnıversıtettiń dosenti Gúlbaıra О́telbaı. Apamyz qaıtarynan bir jyl buryn qoljazbalaryn osy kisige amanattap ketken eken. Kitaptyń demeýshisi – isker azamat, qaıratker Erlan Barlybaev.
Sádýaqas Ǵylmanı – elimizdiń aıtýly din ǵulamasy, ótken ǵasyrdyń 20–30-jyldary kózqarasy men senimi úshin qýdalanǵan tulǵa, 1952–1972 jyldary Qazaqstan qazııatyn basqarǵan qaıratker, aýdarmashy. Sońynda qalǵan kóp murasy áli tolyq kitap bolyp shyqpaǵan. Bir ǵana 108 myń sózden turatyn arabsha-qazaqsha sózdigi sol kúıinde qozǵalmaı tur.
«О́mirimnen eskertkish» qaısar qazaq qyzynyń ateızm dáýirinde áke ósıetine adaldyǵyn, eńbekqorlyǵy men parasatyn, eń bastysy úzilissiz rýhanı murany qunttaýyn, únemi din men dástúr úılesimin nasıhattaǵanyn dáleldeıdi. Kitap murataný, dintaný, ólketaný mamandaryna, rýhanııat tarıhyna qyzyqqan qaýymǵa arnalǵan.
Kitaptyń tanystyrylymyn kitaphana dırektory, dosent Baqytjan Orazalıev ashyp, professor Serik Negımov, kitapty ázirlegen dosent Gúlbaıra О́telbaı, qoǵam qaıratkerleri, ólketanýshylar О́mirserik Erjanov, Manap Ábdireshov, el analary Balapan Aıtbaeva, Mórban Jıenbekova, Úkijan apanyń uly Samat Kárimov pikirin ortaǵa saldy. Jıyndy qazaq ádebıeti kafedrasynyń meńgerýshisi, Alash urpaǵy, ǵalym Qaıyrbek Kemeńger júrgizdi.
Osy is-sharamen qatar dintanýshy, tarıhshy, fılolog, mádenıettanýshy stýdent-magıstranttarǵa arnalǵan «Áke murasyn nasıhattaýǵa arnalǵan ǵumyr» atty sheberlik synyby ótti. Munda Úkijan Sádýaqasqyzy jınaǵan eńbekterdiń mán-maǵynasy men mátindik erekshelikteri taldandy. Muny dintaný kafedrasynyń dosenti Keńshilik Tıyshhan men Jastar departamentiniń dırektory, mádenıettanýshy Jambyl Tilepov júrgizdi. Sheberlik synyby qorytyndysyna sáıkes bilim alýshylar «О́mirimnen eskertkish» mura-kitaby týraly esse jazbaq.
Jalpy, taǵylymdy is-sharanyń mazmuny aǵa býynǵa da, jastarǵa da unady.
Muratbek DÁRIBAI,
dintanýshy
