Komıtet tóraǵasy Ashat Aımaǵambetovtiń jetekshiligimen ótken dóńgelek ústelge Májilis depýtattary, Mádenıet jáne aqparat vıse-mınıstri Qanat Ysqaqov, onlaın negizde respýblıkalyq jáne aımaqtardaǵy aqparat quraldarynyń basshylary, úkimettik emes uıymdar jetekshileri, oblys, qala ákimderiniń orynbasarlary qatysty.
– Búgingi aqparattyq dáýirde BAQ-tyń mańyzy zor. О́zderińizge belgili, búginde aqparattyq keńistikte feıkter men dıpfeıkter qaptap tur. Keıbir sarapshylar bul qubylysty postshyndyq dáýiri dep te aıta bastady. Sondyqtan jasandy ıntellektiniń damýymen qosa feıkter men dıpfeıkterdiń saldarynan ınfodemııa degen uǵym da keń taralyp keledi. Osyǵan oraı memlekettik aqparattyq saıasattyń, jergilikti buqaralyq aqparat quraldarynyń róli erekshe bolmaq. Sol sebepti biz bul máseleni kún tártibine arnaıy shyǵaryp otyrmyz, – degen Ashat Aımaǵambetov aqparat quraldaryndaǵy keıbir keleńsiz jaıttar memlekettik aqparattyq tapsyrystyń tıimdiligin arttyrý máselelerin qaıta qaraýǵa májbúrlep otyrǵanyn jetkizdi. Sondaı-aq ol aımaqtardaǵy, ásirese aýdandyq gazetterge neolıberaldyq paradıgma aıasynda qaraýǵa bolmaıtynyn atap ótti.
– О́ıtkeni jergilikti basylymdar eshqashan qarjylyq tabys ákelmeıdi. Sondyqtan olardyń paıdasyn qarjylyq kórsetkishter arqyly baǵalamaı, ıdeologııalyq tıimdiligin basymdyqqa alýymyz kerek, – dedi A.Aımaǵambetov.
Jıynda baıandama jasaǵan Mádenıet jáne aqparat vıse-mınıstri Q.Ysqaqov sózin saladaǵy kókeıkesti máseleden bastady. Ol qazir merzimdi basylymdardyń jaǵdaıy jaqsy emes ekenin atap ótti.
– Kóp aýdan basylymdaryn birtindep joǵalta bastadyq. Tipti respýblıkalyq gazetter de jabylyp jatyr. Keıingi jyldary jabylý úderisi azdap báseńsigenimen, bolashaqta áli de úlken táýekelder bar. 1991 jyly BAQ sany 350 bolǵan. Búginde olardyń qatary 4 myńǵa jýyq. Sonyń ishinde 70 paıyzy, ıaǵnı basym bóligi merzimdi basylymdar, – degen vıse-mınıstr bulardyń kóbi turaqty jaryq kórmeıtinin de, aqparattyq saıasatqa tolyqqandy aralaspaıtynyn da aıtyp ótti. Sondaı-aq ol 20 mıllıon halyqtyń ishinen 400 myń ǵana oqyrman gazet-jýrnalǵa jazylǵanyn qynjyla jetkizdi.
Jıyrmaǵa jýyq adam sóılegen dóńgelek ústelde «Mass-medıa týraly» zańnyń tetikteri, aqparattyq tapsyrys túıtkilderin joıý, medıa holdıngterdiń tıimdiligin arttyrý tóńireginde usynystar aıtyldy.
Máselen, vıse-mınıstrden keıin baıandama jasaǵan Jambyl oblystyq máslıhatynyń depýtaty, «Jasyn» aqparattyq saıtynyń bas redaktory Oralhan Dáýit aımaqtardaǵy medıaholdıngterdiń qurylýynda eshqandaı birizdilik joq ekenin alǵa tartty. Iаǵnı quryltaıshylar túrli mekemelerden quralǵan. Quddy bir ár oblys basshylyǵy holdıngterdi qurǵan kezde ártúrli zańnyń negizine súıengen sııaqty.
Al Májilis depýtaty Rınat Zaıytov memlekettik aqparattyq tapsyrysty rettemes buryn qoǵamdaǵy qurdymǵa ketken gazet oqý mádenıetin qaıta qalyptastyrý kerektigine erekshe nazar aýdardy. Depýtat Janarbek Áshimjan búgingi qazaq baspasóziniń halin múshkil etip, qıyn jaǵdaıǵa qaldyrǵan mekeme «Qazposhta» ekenin ashyq aıyptady. Ýaqtyly shyǵyp jatqan gazetti aılap eldiń qolyna jetkizbeı otyrǵan monopolısti tezge salatyn tetik pen tártiptiń áli kúnge tabylmaı kele jatqanyna qynjyldy.
Jıynda jýrnalısterdiń mártebesin naqtylaý jóninde de pikirler aıtylyp, barlyq usynys tıisti mınıstrliktiń quzyryna joldandy.
