Aldymen oblys joldarynyń jaǵdaıy týraly aıta ketelik. Burnaǵy jyldary birneshe aýdandaǵy oblystyq, jergilikti mańyzdaǵy joldar jabylyp, eldi mekendermen qatynas tyıylyp, halyq qıyn jaǵdaıda qalǵan edi. Bıyl oblystyń polısııa qyzmetkerleri de qyzyl sýdyń qaýpin seıiltýge qolushyn berip jatyr. Sý oryp ketýi múmkin jol múıisterine beketter men patrýldik jasaqtar qoıylǵan. Mundaı qaýipti jer de az emes. Jalpy sany júzden asady. Oblys ortalyǵynyń ózinde de jaǵdaı turaqty bolmaı tur.
«Abaı kóshesindegi kópirde keptelis paıda boldy. Halyqtyń qaýipsizdigin saqtaý úshin onnan asa qyzmetkerimiz kúni-túni kezekshilikte tur. Olar jol boıyndaǵy qaýipsizdikti saqtaýmen birge, sý basqan turǵyn úılerdegi halyqty shyǵarýǵa da járdemdesip jatyr», deıdi Kókshetaý qalalyq polısııa basqarmasy bastyǵynyń birinshi orynbasary Janat Sháripov.
Qazirgi tańda oblystyń tasjoldarynda 300-ge jýyq polısııa kezekshilik atqaryp jatyr. «Qazavtojol» mekemesi oqys oqıǵa týraly málimet taratqan joq. Al jalpy eldegi ahýal alańdatarlyq. Bir ǵana Astrahan aýdany boıynsha 9 eldi mekenge sý basý qaýpi tónip tur. Ákimdiktiń málimetine qaraǵanda, qaýip joǵary eldi mekenderden 37 myń tekshe metr qar shyǵarylǵan, qazir ınertti materıaldar jetkizilip jatyr.
«Aýdan ákimdigi bıyl jergilikti bıýdjetten tótenshe jaǵdaıdyń aldyn alý jáne onyń zardaptaryn joıýǵa 8 mln teńge qarajat bóldi. Qazir ózen boıyndaǵy seńdi jarý jumystary júrgizilip jatyr», deıdi Astrahan aýdany ákiminiń orynbasary Rýslan Muqanov.
Aýdan aýmaǵynda gıdrotehnıkalyq bes qurylystyń bar ekenin aıta ketelik. Sonyń biri – Qyzyljuldyz bógeti. Bóget apatty jaǵdaıda. Jobalyq-smetalyq qujaty ázirlenip, saraptamaǵa usynylǵan. Zelenoe aýlynyń mańyndaǵy uzyndyǵy 600 metrlik aýylishilik avtojol arqyly tasqyn sýdyń bógetsiz ótýin uıymdastyrý úshin tabıǵı aryqtar tazalanyp, túbi tereńdetilip jatyr. Iаgodnoe aýlyna kireberistegi avtojoldyń jıegi nyǵaıtylyp, sý oryp ketken tustary jabyldy. Aýdanda 140-qa jýyq tehnıka jumys istep tur. Oqys oqıǵa bola qalsa, adamdar panalaıtyn ýaqytsha baspana men tórt túlik maldy qamap baǵýǵa laıyqtalǵan oryn daıyndalǵan.
Atbasar aýdanynda jaǵdaı turaqty. Naýryzdyń 18-inen bastap jedel shtab jumys isteıdi. Qaladan 20 tekshe metrge jýyq qar shyǵarylǵan.
«Keıingi úsh kún ishinde aýdan turǵyndarynan 400-ge jýyq habar tústi. Ár habarlamaǵa jete mán berip, jedel kómek kórsetip jatyrmyz. Zardap shekkender bolsa tıisti kómek kórsetildi. Taıaýda Jambyl oblysy tótenshe jaǵdaılar departamentiniń kómegi de jetpek. Árıne, shyndyǵyn aıtqanda jer úılerdiń aýlalarynan qardyń der kezinde shyǵarylmaı qalǵany jóninde oryndy ókpe-naz týyp jatyr», deıdi Atbasar aýdanynyń ákimi Amanbek Qaljanov.
Apattyń úlkeni Kókshetaý qalasynda boldy. Qalany qaq jaryp ótetin Qylshaqty ózeni kópir men joldy shaıyp, turǵyn úılerdi basyp qaldy. О́zen tasyǵan alǵashqy túnde 8 jeke turǵyn úı, 7 kópqabatty turǵyn úı, 28 jeke úıdiń aýlasy sý astynda qaldy.
«Túnde ózen sýy kúrt kóbeıdi, sýdyń aǵýyna seńniń kóptigi bóget boldy. Kópir astynan sý ótkizetin qondyrǵylardyń kúshi jetpeı qalyp, ózen arnasynan asyp ketti», deıdi Kókshetaý qalalyq tótenshe jaǵdaılar basqarmasynyń bastyǵy Maksım Shatkovskıı.
Kúndiz qaýip seıilgendeı bolǵanymen, qyrdaǵy qardyń kúrt erýine baılanysty túnde ózen sýy qaıta kóterildi. Oblystyq tótenshe jaǵdaılar departamenti baspasóz qyzmetiniń málimetinshe, 150 metr aralyqqa 280 tonna ınertti materıal tóselip, 110 metrge jýyq arnalar men aryqtar keńeıtilip, birshama tereńdetilgen. Shamamen myń tekshe metrge jýyq qyzyl sý sorylyp, qaýipsiz jerge quıylǵan.
«Qarǵyn sýdyń aldyn alýǵa 59 adam, 4 tehnıka, 9 motopompa jumyldyryldy. Eriktiler de qol ushyn berip jatyr», deıdi departamenttiń baspasóz hatshysy Ersaıyn Qoıshybaev.
Qyldaı bolyp aǵatyn Qylshaqty ózeni jyl saıyn tasıdy. Bıyl mamandardyń esepteýine qaraǵanda sý deńgeıi 1,9 metrge kóterilgen. 16 turǵyn úıdi, 29 aýlany, 12 kópqabatty úıdiń jertólesin sý basyp qaldy. Temirjol aýrýhanasy men balalar baqshasynyń birinshi qabatyna da sý kirdi. 111 adam arnaıy daıyndalǵan oryndarǵa panalatyldy. Apat aımaǵynda 230 adam jumys istep jatyr. 85 tehnıka paıdalanyldy.
О́zen sýy kóterilgenshe daıyndyq jumystary joǵary deńgeıde degen aqparat jıi aıtylýshy edi. Qyzyl sýdyń ekpini jumys sapasynyń qanshalyqty ekenin anyqtap berdi.
Aqmola oblysy
