Aýdan ákimi Rýslan Nurmuhanbetov páter ıelerine kilt tabystap, qýanyshyna ortaqtasty. Jańa baspana ıelerine qutty bolsyn aıtyp, mundaı ıgilikti sharýanyń ári qaraı da jalǵasatynyn atap ótti.
Ata-ana qaraýynsyz qalǵan balalar men jetimderdiń jergilikti atqarýshy organ jaldaǵan turǵyn úıden birinshi kezekte baspana alýǵa quqy bar. Ári baspanamen qamtýdy ákimdik júzege asyryp otyrady.
Úı kezeginde turǵan osyndaı sanattaǵy jandarǵa Osakarov aýdanynda 2020 jyldan beri jańa úıler salynyp jatyr. Kezeń-kezeńimen kezekte turǵan jandarǵa úlestirilip keledi. Bul joly ata-ana qamqorlyǵynsyz qalǵan bes balaǵa, kópbalaly úsh otbasyǵa jáne áleýmettik osal topqa jatatyn 10 adamǵa páter kilti tabystaldy.
Jańa úıge jaýapty bolǵan merdiger kompanııa páter ishine tolyq jóndeý jasaǵan. Eki jáne úsh bólmeden turatyn páter ishi keń ári jaryq. Barlyq páter turǵyn úı kommýnaldyq sharýashylyǵyna berilgen. Ondaǵy mamandar kezekte turǵan jandarǵa úlestirip bergen. Sáýir aıynda taǵy segiz otbasyn baspanamen qamtamasyz etýdi josparlap otyr. Onyń ishindegi eki páter asyraýshysynan aıyrylǵan jandarǵa berilmek.
Jergilikti ákimdiktiń deregin sóıletsek, Osakarov aýdanynda turǵyn úıge muqtajdar retinde esepte turǵandar tiziminde 996 adam bar. Onyń 626-sy – jetim balalar. Al 176-sy – áleýmettik osal toptaǵylar. Buǵan qosa 136 bıýdjettik uıymdardyń qyzmetkeri, 49 kópbalaly otbasy da bar. 9 otbasynyń úıi qaýipti dep tanylǵan.
Úıdiń kezeginde eki jyl turyp, jańa úıden úsh bólmeli páter ıelengenniń biri – Olga Irjavskaıa. Úsh qyz, bir ul tárbıelep otyrǵan kópbalaly ananyń qýanyshynda shek joq. Buǵan deıin ata-enesimen birge turyp kelgen.
– Munda barlyq jaǵdaıymyz oılastyrylǵan. Jóndeý jumystary tolyq júrgizilipti. Edeni qaptalyp, qabyrǵalary sylanǵan. Biz tek kóship kele salamyz. Úlkenim 11 jasta bolsa, kenjemiz – altyda. Balalarymmen birge úıimizdi kórip, kiltimizdi aldyq. Olar erekshe qýanyp júr. Endi tezirek kóshkileri keledi, – deıdi Olga Aleksandrovna.
Mine, bir-aq kúnde kórshi bop shyǵa kelgen 18 otbasy kezek-kezek qonystoı toılaıdy.
Qaraǵandy oblysy,
Osakarov aýdany
