Sońǵy málimet boıynsha oblys aýmaǵynda qaýipti jerlerden 4525 adam evakýasııalandy, onyń 1771-i – bala. Qaýipsiz oryndarǵa 1425-ten astam iri qara, 2004 bas usaq mal jáne 33 bas jylqy aıdalǵan.
Barlyǵy 764 myń metrden astam erigen sý sorylyp, 161 myńnan astam qap tóseldi.
«Qazir oblys boıynsha 1 myńnan astam adam tasqynǵa qarsy kúresip júr, 300-den asa tehnıka jáne 100-den asa motosorǵy jumyldyrylǵan», dep habarlady Tótenshelikterdiń baspasóz qyzmeti. Olar kúsheıtilgen rejimde jumys júrgizip jatyr.
Shyńǵyrlaý, Jaqsybaı, О́leńti, Buldyrty ózenderindegi sý deńgeıi kóterilýi nátıjesinde 4 aýdannyń 9 aýylyndaǵy turǵyn úılerdi sý basqan. Barlyǵy 515 turǵyn úı sý astynda qaldy. Bul san áli naqtylanyp, tekserýden keıin jergilikti atqarýshy organdar komıssııasy zalaldy baǵalaıdy. Onyń nátıjesi boıynsha sý basqan úılerdiń naqty sany aıqyndalady.
Bórli aýdanynda 2 sáýirde saǵat 07:00 shamasynda bógettiń eki jerinen sý tolǵany anyqtalyp, dereý sharalar jasaldy. Sońǵy málimet boıynsha, oblysta 25 jerde avtojoldardyń ústinen sý ótip ketse, 32 tusta sý shaıyp, joldy búldirgeni anyqtaldy.
Táýlik boıy qyzmet etip turǵan BQO TJD jedel shtabyna 2 myńnan asa, «qaýyrt jeli» telefonyna 296 qońyraý tústi. Qazirgi ýaqytta jaǵdaı turaqty kúrdeli bolǵanymen, tıisti mekemeler baqylap otyr.
«Qazgıdromet» fılıaly búginnen bastap kún jylynatynyn, aýa temperatýrasy kóteriletinin habarlady. Osyǵan oraı sý tasqyny qaýpi saqtalady. Qazir tıisti mamandar jaǵdaıǵa monıtorıng júrgizip, sý basý qaýpi bolǵan jaǵdaıda evakýasııalyq sharalarǵa kirisýge daıarlyq jasap jatyr.
