Foto: Senattyń baspasóz qyzmeti
Senator Amangeldi Nuǵmanov Aqtóbe oblysynda apattan zardap shekken turǵyndarmen, oblystyq máslıhat depýtattarymen, óńir basshylyǵymen kezdesti. Onda tasqyn sýǵa qarsy is-qımyl jáne zardap shekkenderge kómek kórsetý tetikteri talqylandy.
Depýtat Sergeı Karplıýk Qostanaı oblysynda gýmanıtarlyq kómek jınaý pýnktterinde bolyp, zardap shekkendermen, eriktilermen, qutqarýshylarmen kezdesip, olardyń tabıǵı apatty joıý kezeńindegi janqııarlyq eńbekterine rızashylyǵyn bildirdi.
Senator Qaırat Tastekeev Abaı oblysyndaǵy sý tasqyny saldaryn joıý barysymen tanysty. Ol óńir basshylyǵynyń aldynda el Prezıdenti tapsyrmasy boıynsha zardap shekkenderge kómek kórsetýdiń mańyzyn atap ótti, sondaı-aq oblys aktıvimen birlesip aldaǵy ýaqytta tótenshe jaǵdaılardyń aldyn alý tetikterin talqylady.
Senator Ernur Áıtkenov Pavlodar oblysyndaǵy tabıǵı apattan zardap shekken aýdandarda boldy. Ol sýdy burý júıeleri jóninde shuǵyl sharalar qabyldaý qajettigine óńir basshylyǵy men salalyq qyzmetter ókilderiniń nazaryn aýdardy.
Soltústik Qazaqstan oblysynda bolǵan Ásem Rahmetova óńirdegi jaǵdaı baqylaýda ekenin, biraq óńirdegi birqatar eldi mekenderge qaýip tóndirýi yqtımal erigen sýdyń kelýi kútilip otyrǵanyn habarlady. Depýtat osyǵan baılanysty sýdy burý jáne tasqyn sýdy aıdaý boıynsha júrgizilip jatqan jumystardyń barysymen tanysty.
Arman О́teǵulov Batys Qazaqstan oblysynda jergilikti ákimdikter jáne Tótenshe jaǵdaılar mınıstrligi ókilderimen birlese otyryp aýdandardy budan bylaı sý basýdyń aldyn alýǵa qatysty máselelerdi sheshý úshin óńirlik shtabtyń jumysyna atsalysty.
