Baıqaýǵa 22 atalym, atap aıtqanda halyq aspaptary, estradalyq án aıtý, kórkem sóz oqý, zamanaýı bı, beıneleý jáne sándik-qoldanbaly óner, fotografııa jáne basqalar boıynsha 500 ótinim berildi. Aımaqtyq irikteý týrynda onnan astam ujym horeografııalyq kompozısııalarmen óner kórsetti. «Halyq bıi» jáne «Zamanaýı bı» atalymdarynda «Tumar» ansambliniń orta jas toby altyn, eń kishi toby qola medal jeńip aldy.
Bul balalar Qarýly kúshter Ulttyq áskerı-patrıottyq ortalyǵy ansambliniń janynda ashylǵan úıirmelerge qatysady. «Jas sarbaz» balalar stýdııasyn jáne «Tumar» ansamblin pedagog-horeograf – 3-synypty serjant Almıra Asylbekova, qoıýshy-horeograf – Qarýly kúshterdiń qyzmetkeri Erjan Qudaıbergenov basqarady.
– «Tumar» bı ujymynda 5 jastan 14 jasqa deıingi aralyqta 90 bala bar. Ansambldiń qurylǵanyna nebári bir jarym jyl ǵana boldy. Jumys tórt jas toby boıynsha uıymdastyrylǵan. Kásibı qazylar alqasy bizdiń eńbegimizdi joǵary baǵalady, – dedi A.Asylbekova.
Ulttyq Delfıı oıyndarynyń jeńimpazdary halyqaralyq deńgeıde elimizdiń namysyn qorǵamaq.
