Dáriger nege jetkiliksiz?

Elimizdiń qaı qıyrynda bol­syn, dáriger tap­shylyǵy sezi­letini jyldar boıy aıtylyp júr. Dárigerge qoly jetpeı, ábi­gerge túskenderdiń de muńy az emes. Kadr tapshylyǵy máselesi Jam­byl oblysyn da aınalyp ótken emes. Aldyńǵy jyldary dári­ger tapshylyǵy júzden asyp ket­se, keıingi ýaqytta edáýir azaı­ǵan kórinedi. Áıtse de derek­ke júginsek, óńirde 80 dáriger je­tis­­peıdi eken. Endi osy bir ótkir má­se­­leni sheshýdiń mańyzy zor eke­nine eshkimniń talasy joq shyǵar.

Birshama ýaqyt buryn ótken bas­pasóz máslıhatynda Den­saý­lyq saqtaý basqarmasynyń basshysy Janar Ospanova dáriger tap­shylyǵy áli de seziletinin, bul máseleni retteý boıynsha naqty jumystar atqarylyp jatqanyn tilge tıek etti.

– Búginde oblysta dárigerler tap­shylyǵy 2022 jylǵy 106-dan esepti kezeńmen salystyrǵanda 80 birlikke (32 qala, 48 aýyl) tómendedi. Jergilikti atqa­rý­shy organnyń grantymen S.Asfen­dııa­rov atyndaǵy Qazaq ulttyq medısına ýnıversıtetinde joǵary bilimi bar kadrlardy daıarlaý úshin jalpy medısına maman­dyǵy boıynsha 42 stýdent oqıty­nyn aıta ketken jón bolar. Osy ýnıversıtette jergilikti bıýdjet esebinen oqý bitirgennen keıin Jambyl oblysynyń mem­lekettik medısınalyq uıym­darynda 5 jyl jumys isteý min­dettemesimen 2022 jyly 16 dári­ger jumysqa keldi. 2023 jyly 19 dáriger ju­mysqa ornalasty, – deıdi bas­qar­ma basshysy.

Keıingi derekke júginsek, kadr tapshylyǵyn joıý boıynsha birqatar jumys atqarylǵan eken. 13 jas maman turǵyn úı­men qamtamasyz etilse, 149 dári­gerge 800 myń teńge somasynda kó­terme járdemaqy berilipti. Sondaı-aq birneshe dárigerge 1 500 aılyq eseptik kórsetkishke deıin bıýdjettik nesıe berilse, 38 mamanǵa 100 aılyq eseptik kór­­setkish kóleminde járdemaqy beri­lipti. Buǵan qosa 91 maman rezı­dentýrada oqıdy eken. Bir qara­ǵanda qoldaý kórsetilip-aq jatyr.

Aıta bersek, kadr tapshy­ly­ǵyn joıý maqsatynda qolǵa alynǵan jumys az emes. Áıtse de, dárigerlerdiń azdyǵy áli de baıqalyp tur. 2022 jylǵy kór­setkishpen salystyrsaq, dári­ger tapshylyǵy 26 adamǵa aza­ıypty. Bir jyl ishinde kadr de­fı­s­ıti 26 adamǵa azaıǵany kóńil kón­shite me? Dál osylaı kete ber­sek, qalǵan 80 mamandy tabýǵa taǵy birneshe jyl qajet bolmaı ma? Osy saýal oılandyrmaı qoı­maı­dy.

Densaýlyq saqtaý basqarmasy baspasóz qyzmetiniń jetekshisi Tolqyn О́mirbaevanyń aıtýynsha, dáriger tapshylyǵyn joıý boıynsha bıyl da naqty jumystar qolǵa alynyp jatyr.

– Osy jyly respýblıkalyq bıýdjetten 80 orynǵa, jergilikti bıýdjetten 77 orynǵa grantqa ótinim berildi. Tıisti bıýdjet ese­binen rezıdentýrany bitirgen ­30 dáriger – 2024 jyly, 16 dáriger – 2025 jyly, 10 dáriger 2026 jyly jumysqa keledi degen jos­par bar, – deıdi ol.

Derekke sensek, óńir medısınasy jalpy praktıkalyq dáriger, anestezıolog-reanımotolog, akýsher-gınekolog, oftalmotolog sekildi mamandarǵa áli de bolsa, zárý kórinedi.

Qalaı desek te, kadr tapshy­lyǵy máselesi medısına salasynda áli de ózektiligin joımaı tur. Basy aýyryp, baltyry syz­dasa, dárigerge júginetin jer­gi­likti halyq ta ara-tura maman tapshylyǵynyń keri áserin sezi­netini ras. Qysqasy, bul prob­lema az kúnde tolyqqandy sheshimin taba qoıýy ekitalaı sekildi. Eń bastysy, atqarylyp jatqan jumys nátıjeli bolsa deımiz.

Jambyl oblysy