Al Qyzylqoǵa aýdany ákimdiginiń málimetinshe, 31 naýryzda Oıyl ózeni arnasynan asyp, tasqyn sýdyń Mııaly aýylyna kirý qaýpi tóngen edi. Sol sebepten aýdanda tótenshe jaǵdaı jarııalandy. О́ıtkeni aýyldyń irgesine tirelgen sý deńgeıi 1 metr 20 sm-ge jetti. Jolyndaǵynyń bárin typ-tıpyl etetin topan sýdan qutqarý qajet boldy. Sóıtip, Mııaly aýylynyń turǵyndaryn ishinara evakýasııalaý bastaldy. Sanaýly saǵatta analar men balalar, naýqastar men múgedekter sanatyndaǵy 600-ge jýyq turǵyn eki mektep pen bir balabaqshaǵa ornalastyryldy.
Oıyl ózenindegi sýdyń arnasynan asýyna baılanysty okrýgterge qaıyqpen qatynaý toqtatyldy. «Mııaly-Saǵyz» baǵytyndaǵy joldy sý basyp, kólik qatynasyna shekteý qoıyldy.
«Mııaly aýylynyń irgesindegi bógetti kóterý, bekitý, qapshyqqa qum toltyrý jumystary jalǵasyp jatyr. Oǵan mekemelerden – 275, polısııa bóliminen – 48, tótenshe jaǵdaılar bóliminen – 35 qyzmetker, 3 myńnan asa erikti jumyldyryldy», dep habarlady aýdandyq ákimdikten.
Oblystyq qurylys, sáýlet jáne qala qurylysy basqarmasy óńirdegi kásiporyndardyń tehnıkasyn Mııaly aýylyna kómekke jiberdi. Naqtylaı aıtqanda, «Nurkapıtal» JShM-nan – 1 býldozer, «Suńqar Qurylys LTD» jáne «Temirstroıservıs» JShS-dan – 2 júk tıegish, 2 ekskavator, «Nurkapstroıgaz» JShS-dan 1 júk tıegish tehnıka tartyldy.
Jergilikti 15 kásipker aýyldy tasqyn sýdan qorǵap júrgen jigitterdi ystyq taǵammen qamtýdy qolǵa aldy. Kásipkerler bir kúnde 1 500 adamdyq ystyq taǵam men sýsyn daıyndady.
«Tasqyn sýdyń qaýpi tóngende aýyldyń úlkeni men jasy qolǵa kúrek alyp, mekenimizdi qorǵaýǵa jumyla kiristi. Biz olardy jáne barlyq tehnıkamen kómektesken «AIS» JShS-nyń jumysshylaryn ystyq taǵammen qamtýdy uıǵardyq», deıdi jergilikti kásipkerler palatasynyń basshysy Altynzer Baımuratova.
Ystyq jáne ózge de taǵamdar «Baqyt» meıramhanasynda ázirlendi. Munda úzdiksiz jumys istep júrgenderdiń arasynda Gúlzıra Eleýǵalıqyzy da bar.
«Halqymyzdyń birligi men berekesi osyndaı sátte kórinedi. Er-azamattar kúni-túni aýyldy sýdan qorǵaý úshin aýyzbirshilik tanytty. Men de ózimniń kıim satatyn dúkenimniń esigin kilttep, osy jerde júrmin. Tek tabıǵı apattan aman shyqsaq eken», deıdi Gúlzıra Eleýǵalıqyzy.
Mııaly aýylynyń Báıseý bóliginde turatyn Serik Ojaevtyń otbasy da janashyrlyq iske bel sheshe kiristi. Bul otbasynyń músheleri bóget turǵyzyp, qapshyqqa qum toltyryp jatqandardy tamaqtandyrdy.
Qyzylqoǵa aýdany ákimdiginiń aqparatyna súıensek, munda 557 sharýa qojalyǵy bar. Onyń ishinde 407 sharýashylyq Oıyl ózeniniń boıynda ornalasqan.
«Sharýa qojalyqtarynyń ıelerine Oıyl ózenindegi sýdyń kóterilýinen tóner qaýip týraly aldyn ala eskertildi. О́zendegi sýdyń kúndelikti deńgeıi men tasqynnyń ekpini udaıy habarlandy. Osyndaı eskertýdiń nátıjesinde Jambyl, Jangeldın, Oıyl, Taısoıǵan okrýgterinde tirkelgen 7 sharýa qojalyǵynyń 14 adamy men tórt túligi qaýipsiz aýmaqqa kóshirildi. Tórt túliktiń ishinde 2 209 qoı-eshki, 448 múıizdi iri qara, 138 jylqy, 20 túıe bar», dep málimdedi aýdandyq ákimdikten.
Bir aýyldy ǵana emes, eldi qıyndyqtan osyndaı aýyzbirshilik qutqarary daýsyz.
Atyraý oblysy
