Tótenshe jaǵdaı óńirdegi sý tasqyny qaterine baılanysty jarııalanyp otyr. Tasqynnyń aldyn alý jumystaryna oblys ákiminiń orynbasary Qalııar Aıtmuhambetov basshylyq etedi.
Qazir óńirdiń tórt aýdanynda birneshe eldi mekenge sý kirip, turǵyn úıler búlindi. Adamdar men haıýanattar qaýipsiz jerge kóshirilgen.
Endi bastaýyn Reseı aýmaǵynan alatyn transshekaralyq ózenderdiń deńgeıi kúrt kóterilip keledi. О́ńirde mundaı ózender sany beseý: Jaıyq, Shaǵan, Derkól, Qaraózen men Saryózen. Dál qazir sońǵy eki ózenniń sýy arnasyna tolyp aqty, bul Qaztalov pen Jańaqala aýdandary aýmaǵyndaǵy 22 eldi mekenge qaýip tóndirýi múmkin. Jergilikti bılik oryndary, halyq bir kisideı jumylyp, qaýipsizdik sharalaryn jasap jatyr.
Sondaı-aq Shaǵan, Derkól jáne Jaıyq deńgeıi de sát sanap kóterilip barady. Keı jerde sý deńgeıi qaýipti kórsetkishten de asyp ketti.
О́ńirde búginde 4 myńnan asa adam qaýipsiz jerge kóshirildi. Bulardyń teń jarymy – balalar. Oblysta jalpy sany 219 evokopýnkt bar. Qazir oblysta barlyq deńgeıde tasqynnan zardap shekkender úshin gýmanıtarlyq kómek uıymdastyrylyp jatyr. Joldardyń, kópirderdiń búlinýinen «úlken jermen» qarym-qatynassyz qalǵan aýyldarǵa azyq-túlik, kerek-jaraq jetkizý júıeli júrgizilip otyr. Mysaly, Qaratóbe aýdanyndaǵy Sýlykól, Úshana, Tólen, Temirbek, Qosbaz, Aqqozy, Qorjyn, Aqtaısaı aýyldary qazir aralda qalǵan. Buǵan qosa Keıingi kúnderi Terekti aýdanyna qarasty Podstepnoe aýylyn sý alyp, júzge jýyq úıge qaýip tóngen edi.
Keshe Batys Qazaqstan oblysynyń ákimi Narıman Tóreǵalıev oblys halqyna úndeý jarııalap, qıyn kezeńde sabyrlyq saqtap, bir-birine qoldaý kórsetýge shaqyrdy.
«Qadirli jerlester, búgin Memleket basshysyna oblystaǵy jaǵdaıdy baıandadym. Prezıdent óz tarapynan halyqqa barynsha kómek kórsetiletinin aıtty. Zardap shekkenderdiń árqaısysy memleket tarapynan beriletin kómekten qalys qalmaıdy. Qutqarýshylar, tótenshe jaǵdaı mamandary, kommýnaldyq qyzmetter, kúshtik qurylymdar, volenterler jáne turǵyndarymyz kún demeı, tún demeı sý tasqynymen kúresip jatyr. Men úshin jerlesterimniń amandyǵy – birinshi orynda. Sondyqtan tasqynnyń aldyn alýǵa baǵyttalǵan barlyq qajetti sharalar atqarylady», dedi óńir basshysy.
Batys Qazaqstan oblysy
