Sýretti túsirgen – Erlan OMAR, «EQ»
Ultymyzdyń bolashaqtaǵy bolmysyn aıǵaqtap, qazyǵyn qaǵyp beretin memlekettik deńgeıdegi dárejesi bıik dástúrge aınalǵan Quryltaıdyń ótýi memleket pen qoǵam arasyndaǵy altyn kópir ispettes. Olaı deıtinimiz, qoǵamnyń ilgeri damýyna tyń serpin berý arqyly jańa qadamdar jasaý, ult kelesheginiń jarqyn jańa josparyn qurý, el ıgiligine baǵyttalǵan utymdy sheshim qabyldaý – memleket pen azamattyq qoǵam úshin salmaqty sara jol, tarıhı máni joǵary mańyzdy sát.
Bıylǵy Quryltaıdyń kún tártibinde halqymyzdyń bereke-birligin saqtap, eldiktiń nyshanyn jańǵyrtýda asa mańyzdy salıqaly oı, keleli pikir, tereń tujyrymdar tarazylanyp, jalpyulttyq qundylyqtardy damytýdyń mańyzdy máseleleri talqylandy. Memleket basshysy Qazaqstan – Uly daladaǵy kóshpeliler órkenıetiniń tikeleı murageri ekenin atap ótip, dala órkenıetiniń aınasy bolǵan ulttyq mádenıetimizdi saqtaý, tól tarıhymyzdy dáripteý, oǵan qurmetpen qaraý – ultymyzdyń mańyzdy qadamy dep sanaıdy.
Prezıdent tarapynan aıtylǵan ulttyq biregeılikti qalyptastyryp, ony saqtaýda til, din, rýhanııat, salt-dástúr, ulttyq bolmys-bitim qalyptastyrý syndy tyń usynystar halqymyzdyń jańa kelbetin, mádenıeti joǵary qoǵam qalyptastyrýǵa jol ashady. Ásirese babalar amanaty bolǵan salt-dástúrimizben astasqan ata dinimizdi ustaný – eldiktiń rýhanı qazyǵy. Ulttyq oıý-órnekpen kómkerilgen ulttyq kıim úlgisin qaıta jańǵyrtý, ony kúndelikti kıip júrý – ult bolashaǵynyń jarqyn kórinisi, dástúrge qurmettiń belgisi. Osy turǵyda Prezıdent radıkaldy neofıtter halqymyzdyń saltynda joq kıim úlgileri arqyly da jat dinı ıdealdardy qoǵamǵa tańýǵa tyrysyp júrgeni dástúrli uǵymdarymyz ben qundylyqtarymyzǵa jasalyp jatqan shabýyl dep naqty atap ótti.
Sondaı-aq Quryltaıda ulttyń saýlyǵyna asa mán berildi. Keıingi jas býynnyń ómirin nashaqorlyqtan, qumar oıynnan ult saýlyǵynyń saqtalýyna óz septigin tıgizetini aıtyldy. Quryltaıǵa qatysýshylar tarapynan birqatar usynys berilip, naqty tujyrymdamalar bekitildi. El bolashaǵy búgingi jas órenderdiń qolynda bolatyny eskerile otyryp, keleshek jastarymyzdyń boıynda ǵylym men bilimge degen maqsat-muratyn aıshyqtaıtyn kitap oqý mádenıetin qalyptastyrý, Astana jáne Almaty qalalarynda táýlik boıy jumys isteıtin kitaphanalar salý, ulttyq kitap kúnin atap ótý ıdeıasy jańa býyndy jańa bir beleske kótereri belgili. Dana halqymyz «Kitap – bilim butaǵy, bilim – ómir shyraǵy» dep izgiliktiń joly kitapta ekenin urpaq jadyna sińirip ketken. Qoǵamda kitapqa degen qurmetti jańǵyrtý – jarqyn keleshektiń kepili.
Kıeli Ulytaýdan bastaý alyp, qasıetti Túrkistanda taǵdyrly sheshimderge serpin berip, tarıhı ólke Atyraý tórinde jalǵasyn tapqan Ulttyq quryltaıda Memleket basshysy Qasym-Jomart Toqaev pen zııaly qaýym ókilderiniń tushymdy tujyrymy men utymdy oılary ultty bir uıaǵa uıystyryp, halqymyzdyń salt-sanasyn bir arnaǵa toǵystyrǵan mańyzdy qadam boldy. Ultty uıystyrǵan quryltaı ultymyzdyń jańa bir kelbetin qalyptastyrýǵa, el damýynyń jańa bir belesin baǵyndyrýǵa jol ashady dep senemiz.
Medet QÝANYShEV,
Qurmanǵazy atyndaǵy Qazaq ulttyq halyq aspaptar orkestriniń dırektory
